Gikatakdang paga-saulogon ang “19th National Awareness Week for the Prevention of Child Sexual Abuse and Commercial Sexual Exploitation” Pebrero 8 ngadto sa 14 ning tuiga.
Mao kini ang nakuhang kasayuran gikan sa Memorandum Circular no. 2015-03 nga giluwatan sa nasudnong buhatan sa DILG nga gipetsahan ug Enero 27, 2015 ug pinirmahan ni kalihim Mar A.Roxas.
Sumala sa unod ning maong circular nga sumala sa proklamasyon no. 731, serye sa 1996, and ikaduhang semana sa bulan sa Pebrero sa matag tuig ang gideklarar isip “National Awareness Week for the Prevention of Child Sexual Abuse and Commercial Sexual Exploitation” o nailang Child Sexual Abuse Awareness Week (CSAAW), diin paga-saulogon sa matag tuig ilawom sa pagpanguna sa Council for the Protection of Children.
Sumala pa nga alang ning kasamtangang tuig sa 2015, kining usa ka semana nga kasaulogan gikan Pebrero 8 ngadto sa 14 ang nagdala sa tema nga: “Labanan ang Pang-aabusong Sekswal sa mga Bata: NOW NA!
Matud pa nga kining tinuig nga pag-obserbar pinaaagi sa CSAAW ang magatudlo kon unsaon sa pagmugna sa palibot nga luwas, mapanalipdon ug amomahon alang sa mga kabataan.
Subay ning maong kasaulogan, gi-awhagan ang tanang mga hepe ehekutibo sa mga loka nga kagamhanan sa pagsuporta niini dinha sa ilang matag dapit, uban na sa pagpanguna ug pipila ka mga kalihokan sama sa:1.) Pagkutay ug mga streamers; 2) Pagsangyaw ning maong kalihokan atol sa flag raising ceremony; 3) pagmugna ug mga lectures ug symposiums kalabot sa maong kasaulogan , 4) pagmugna ug mga indigay sa pagpinta/ quizbee nga magpakita sa tema ning maong kasaulogan ug 5) pagmuna ug mga fun run ug uban pa.(CIO-alb)

Share on: