Gitakda na gayung ipahigayon ang “ 1st Dipolog City Kayak and Dragon Boat Race” karong Mayo 2 ug 3 ,2015 sa kadagatan atubangan sa Dipolog boulevard.
Nasayran nga dunay 8 ka teams gikan sa kaulohang Manila ug uban pang lugar ang mosalmot sa 20-seater mixed,300 meters ug kayak triyak,300 meters nga lumba sa pagbugsay.
Gumikan niini nga kalambu-an ang kagamhanang lokal sa Dipolog nga girepresentahan ni Mayor Evelyn T. Uy ug ang Philippine Canoe Kayak Federation (PCKF) nga girepresentahan ni Jonne Go mipirma sa usa ka kasabotan pinaagi sa Memorandum of Agreement (MOA) kaniadtong Pebrero 23,2015 sa buhatan sa mayor. Misaksi sa pagpirmahay sila si Leonora Escollante ang hepe sa Technical PCKF ug Phillip R. Veloro ang event in-charge sa kagamhanang lokal sa Dipolog sa Kayak ug Dragon Boat Race.
Tumong sa MOA nga mahan-ay ang mga kalihokan sa pagpahigayon sa lumba pinaagi sa pagtambayayong sa PCKF ngadto sa siyudad . Ang PCKF mohatag usab ug mga gabayan ug iyang teknikal kabahin sa nasangpit nga lumba.
Kahibalo-an nga ang PCKF usa ka assosasyon sa natad sa sports nga bugtong gihatagan ug otoridad sa pagpadas-ug ug pagpalambo sa Philippine canoe,kayak, dragon boat ug uban pang paugnat sa kusog sa pagbugsay sa nasud sa Pilipinas, diin nahisakop usab sa Philippine Olympic Committee ug Philippine Sports Commission (PSC) .
Na-obserbahan usab nga ang dakbayan sa Dipolog isip lugar nga nahimutang daplin sa dagat interesado sa pagpalambo sa “paddling sports” o paugnat sa kusog sa pagbugsay nga nahasubay usab ubos sa panglantaw sa siyudad nga mahimong Center of Outdoor Sports of the South by 2020.
Gawas sa kayak ug dragon boat race, ang PCKF mopahigayon usab ug clinic o pagbansay-bansay sa mga interesadong kabataan nga nagpangidaron gikan sa 11-14 anyos ilabi na kadtong nagpuyo sa mga barangay duol sa dagat sama sa Olingan, Galas, Miputak, Barra, Minaog ug Sicayab. (CIO/ebp).

Share on: