Gisaksihan sa daghanang mga katawhan ang pagbukas sa ‘1st Mayor Evelyn T. Uy 2015 Football Cup’ kagahapong adlawa Mayo 11, 2015 didto sa Zamboanga del Norte Sports Complex ning dakbayan sa Dipolog nga gipasiugdahan sa Youth Sports Development Council inubanan sa ZN-Dipolog Football Association.

Kining Annual Summer Football League ang gipahigayon sa matag tuig ubos sa nasangpit nga Football Association.
Matud pa ni Mayor Uy sa iyang mensahe atol sa maong kalihukan, nga unta makakab-ot sa mga magdudula sa football alang sa usa ka nasudnong kompetisyon sama sa ubang sports events nga ginapahigayon dinhi sa dakbayan.
Sumpay pa sa Mayora nga daku ang iyang pagsalig nga makasalmut dili lamang diri sa city o sa provincial level ang pagsangka, kon dili lakip na sa nasudnong hut-ong.

Sanglit nga ang pagpahigayon sa sunod-sunod nga mga sports events dinhi sa dakbayan, maoy paghatag ug katumanan ngadto sa panglantaw ning atong dakbayan nga mamahimong Outdoor Sports Center dinhi sa habagatang bahin sa Mindanao sa tuig 2020 kon ‘Sporty Dipolog by the Year 2020’.

Nagkanayon si Zamboanga del Norte- Dipolog Football Association President, Irvin Banga, nga lakip sa iyang gidapit mao ang VAC 83 ilawom sa City Government nga nagapahigayon ug football clinic aron makapadayon usab sila sa ilang katuyo-an nga mamahimong hanas ang ilang gibansay nga mga kabataan.

Dugang pa ni Banga, nga isip president sa ZN-DFA ug kapitan usab sa Barangay Estaka ning dakbayan, iyang gipaninguha nga makatampo ngadto sa katumanan sa Sporty Dipolog by the year 2020.

Gisalmutan kining maong torneyo sa mga nagkalain-laing football organizations sama sa: Top Gun FC, Ducks United, JVC FC, Maria Clara FC, Rollians FC, DMC FC, ABC FC, Man United, Tiago FC (Dapitan City), Sindangan FC, Sporting Dipag.
Matud pa ni Banga, nga ang Philippine Football Federation (PFF) pinaagi sa koordinasyon sa ZN-DFA, ang moduyog usab sa kasaulogan sa ‘Grassroots Festival 2015’ karong umaabot Mayo 16, diin ang tanang kabataan diha sa kinaubsang hut-ong sa katilingban ang gi-awhag nga mabansay alang sa nasangpit nga natad sa dulang football. (CIO-MECC)

Share on: