Malampusong napahigayon ang official launching sa ika-24th Mindanao Business Conference (MinBizCon) kaniadtong February 24, Martes didto sa Dipolog Airport Function Hall, ning dakbayan sa Dipolog.
Ang Dipolog City Chamber of Commerce and Industry ang nagdumala sa nasangpit nga MinBizCon ilawom sa pagpanguna ni Atty. Paul O. Gumalin, ang kasamtangang Presidente sa organisasyon, duyog sa pag-abag sa kagamhanang lokal sa Dipolog ilawom sa liderato ni Mayor Evelyn T. Uy, lakip na ang lalawigan sa Zamboanga del Norte nga gipangulohan ni Governor Roberto Y. Uy, ang Mindanao Development Authority (Minda) ug ang Department of Trade and Industry (DTI).
Nasayran nga ang MinBizCon ang gitambungan sa nagkalaing-laing magpapatigayon, kagamhanang lokal ug nasyonal, lakip na sa mga sakop sa media.
Ang nasangpit nga MinBizCon ang magdala sa tema nga “Winning the ASEAN, Gaining the Global Market”
Si Airport Manager, Engr. Erlinda Delos Reyes ang mihatag sa iyang welcome message ug gisundan sa mensahe usab ni DCCI President, Atty. Paul Gudmalin.
Si VP Annie O. Ty – Area Vice President-Mindanao, Philippines Chamber of Commerce and Industry mihatag sa iyang mensahe “We hope we can garner around or more than 1,000 delegates all throughout the Mindanao because we want to showcase that Zamboanga del Norte and Dipolog City how peaceful it is in this part of the Region”
Gibatbat usab ni Ty nga ang dakbayan sa Dipolog adunay saktong pasilidad ug mga hotels nga makapahiluna sa mga bisita sa umaabot nga MinBizCon.
Si Mayor Evelyn T. Uy, usab ang mipabati sa iyang kinasingkasing nga pasalamat ngadto sa tanang sektor sa magpapatigayon nga misupporta ug misalmot sa maong MinBizCon, ug labaw sa tanan nga ang Dipolog City ang napili isip maong venue sa MinBizCon karong umaabot September 2-4, 2015 dinhi sa dakbayan. Gawas pa, mipasalig usab si Mayor Evelyn sa iyang dakong pagsuporta sa maong MinBizCon.
Ang MinBizCon nag-awhag di lamang sa mga partisipantes nga gikan sa Mindanao kundi gikan pa kini sa silingan nga nasud sama sa Singapore, Thailand, Brunie, Malaysia ug uban pang nasud nga miyembro sa Asean.
Ang paglusad sa maong Mindanao Busines Conference (MinBizCon) maoy usa ka dakong higayon nga mapakita natu ang atong produkto sa Dipolog sa mga mamumuhunan ug mamalitay sa gawas sa nasud.
Nasayran nga ikaduha na ka higayon nga ang Dipolog City mao ang mi-host sa MinBizCon.(CIO-JGA)

Share on: