Nunot sa tali-abot nga pagsaulog sa ika 102 nga kasumaran sa Adlaw sa Dipolog sugod karong Hunyo 22 ngadto na sa Hulyo 1, ning tuiga, pipila ka mga kalihokan ang gihan-ay sa kagamhanang lokal sa dakbayan aron mobolok ning nahisgotang kalihokan.
Usa sa mohatag ug bolok ning usa ka semana nga kalihokan mao ang gikatakdang pagpahigayon sa duha ka adlaw nga “JOB FAIR”. Diin matud pa sa dugang nasayran nga pangunayan sa pagdumala sa Public Service Employment Office kon PESO ning dakbayan pinaagi ni PESO Manager, Engr. Michael O. Reyes.
Sumala pa nga atol ning duha ka adlaw nga kalihokan, pipila ka mga recruitment agencies ang nasayrang mo-anhi dinhi sa atong dapit alang ning maong katuyo-an, nga mag-recruit ug mga trabahantes alang sa local ug overseas employment.
Dugang nasayran nga kining maong recruitment activity ang anha ipahigayon sa 4th floor, City Hall Annex Bldg. karong umaabot HUNYO 29 ug 30, 2015, gikan sa alas 9:00 sa buntag ngadto na sa alas 5:00 ang takna sa hapon.
Alayon ning maong kalihokan, gi-awhagan kadtong mga buot mopahimulos ning maong job fair sa pag-andam na sa ilang mga nanag-unang rekesitos alang niini, ilabi na gayud kadtong mga nakatapos sa ilang pagtuon apan pakyas pang nakakita ug trabaho hangtud karon, ug mga skilled workers, sanglit nga usa kini ang talagsaong higayon.(CIO-alb)

Share on: