Usa ka Memorandum of Agreement (MOA) alang sa Adopt-An-Estero /Water Body Program ang gipahigayon didto sa Top Plaza Pensionne kaniadtong Huwebes sa buntag, Marso 25 ning tuiga. Ang nasangpit nga MOA ang gipirmahan nila ni Dipolog City Mayor Evelyn T. Uy ug Environment Management Board (EMB) rehiyon 9 Officer-In-Charge Jacqueline A. Caancan .
Tumong sa kasabotan nga mabantayan ang pagpatuman sa pagpatunhay sa kalimpyo sa Dipolog River gikan sa Quezon Bridge sa Barangay Estaka hangtud na sa break water sa Central Barangay.
Nasayran nga sa miaging tuig, ang Adopt-An-Estero /Water Body Program ang mi-sentro sa ilang programa sa Miputak Creek nga gilangkoban sa barangay Sta. Isabel ug Miputak . Matud pa ni Mayor Uy nga sukad gipatuman ang programa mibalik na ang kalimpyo sa sapa. Si Mayor Uy ang nakadayeg sa mga lumolopyo sa lugar sa pagpakita sa ilang koorperasyon ug pagtangad aron magpabiling limpyo ang sapa.
Ang nasangpit nga programa dinhi sa Dipolog ang gi-abagan sa Pollution Control Association of the Philippines, Inc. (PCAPI) Dipolog chapter sa pagpangulo ni Javier Suico. Nakigtambayayong usab niini ang pipila ka mga pribadong magpapatigayon ning siyudad nga mao ang Ivy Construction Supply, RIA Poultry Dressing Plant, RGS Construction, 3A Rice and Corn Mill, ug Mandarin Hardware ug mga barangay sa Estaka, Barra, Minaog, Central ug Olingan.
Ang Adopt-An-Estero Program/Water Body Program usa ka lakang sa Department of Environment and Natural Resources-Environment Management Bureau nga nagsugod pipila ka tuig na ang milabay kalabot sa pagpanalipud sa mga katubigan sa nasud ingon man ang pagdumala sa mga basura ug uban pa aron magpabiling lunhaw ug luwas ang atong palibot ug kinaiyahan. (CIO/ebp).

Share on: