Malapuson ug nahimong sadya ang pagpahigayon sa tunga nga adlaw nga “Art Journaling Workshop” nga gisalmutan sa mga babayeng kawani sa kagamhanang lokal kaniadtong Marso 16, 2015 nga didto gipahigayon sa 4th floor sa city hall annex.
Nasayran nga ang maong kalihukan alayon sa pag-obserbar sa “Women’s Month” karung bulan sa Marso tumong sa paghatag sa mga kababayen-an sa “self-expression” pinaagi sa “arts”, nga gipangunahan sa grupong Ta’ Glibon Ini Lady Art Collective, Inc.
Mibulok ang kalihukan pinaagi sa pagpahigayon sa usa ka hamubo nga programa, seminar workshop ug interprestasyon sa gihimong mga visual arts sa mga partisipante.
Gituki usab atol sa seminar workshop ang mga punto sa art appreciation, elements of art ug art journaling. Gipasabut nila ni Ms. Elena Gamalinda ug Ms. Emma Prima, mga kanhi Past President sa hugpong TGI, nga ang pagmugna sa usa ka “art journal” walay sayup nga trabaho tungod kay kini gimugna pinaagi sa panglantaw ug interprestasyon sa mismong artist.
Dugang ni Gamalinda ug Prima nga ang natapos nga mga art journal sa mga kawaning babaye ipasundayag karong umaabot Marso 19, 2015 didto sa booth #1 sa Dipolog Boulevard. Nagpasalamat usab ang TGI ngadto sa mga kawaning partisipante ilabi na kang Mayor Evelyn T. Uy sa paghatag ug higayun sa mga babayeng kawani nga makapadayag sa ilang mga emosyon pinaagi sa “art journaling”. (CIO-prr)

Share on: