Malampusong gipahigayon ang State of the Barangay Address (SOBA) sa Central Barangay ning dakbayan sa Dipolog pinaagi sa pagpangulo ni Punong Barangay Rosanna R. Diaz, ubos sa liderato ni Mayor Evelyn T. Uy niadtong Marso 28, 2015.
Kahibaloan nga alayon sa mandato gikan sa buhatan sa DILG pinaagi ni Kalihim Mar A. Roxas, ang unang semestre sa barangay assembly gikan sa miaging tuig 2014 hangtud niining Marso 2015, diin ang mga programa ug mga proyekto ang gipahibalo ngadto sa mga katawhan.
Unang gibalita ang kabahin sa Oktubre 2014, diin nangamahan ang konseho sa National Children’s Month Celebration.
Sa Nobyembre 2014, mi-aprobar usab ang konseho ug usa ka resolusyon aron mahatagan ug pondo ang tulo ka representante sa Local Council of Women nga mitambong sa usa ka nasudnong panagtigom didto sa dakbayan sa Tagaytay. Gitambungan kini nila ni kapitan Diaz, konsehal Arnold F. Suan – ang Chairman sa Committee on Women ug ang barangay secretary nga mao usab ang president sa LCW.
Sa Disyembre 2014, misuporta ang barangay sa PASADI diha sa Plaza Magsaysay, ug mitambong usab sa kasaulogan sa Rizal’s Death Anniversary.
Nasayran nga imbes nga mopahigayon pa ug Christmas Party ang barangay gikan sa kita nila sa pagpanaygon, ila hinuon gipalit ug pagkaon alang sa mga kaigsu-onang pinireso sa Dipolog City Jail.
Niining bulan sa Enero 2015, gipangandaman usab ang kabahin sa renewal sa Business Clearances ug Community Taxes diha sa tanang establisemento sa patigayon sa barangay sanglit nga usa kini sa aspeto sa income sa barangay gawas sa IRA niini. Kahibaloan nga magpanon usab ang mga negosyante diha sa buhatan sa barangay aron mobayad sa ilang obligasyon gikan sa bulan sa Enero ngadto sa Mayo sa matag tuig.
Niining bulana usab sa Enero ning tuiga, napili ang barangay isip tourist friendly barangay ning dakbayan. Lakip nga isip pagpahibalo ngadto sa mga katawhan, gi-aprobahan sa konseho ang kabahin sa pagpabitay sa tarpaulins aron mapahinumdoman kanunay ang mga katawhan may kalabot sa nag-unang ordinansa, sama sa Ordinance # 123 sa Health and Sanitaton; Ordinance # 196 sa No Smoking; ug ang Ordinace 245 sa No Plastic Day sa matag adlaw sa Biyernes sa tanang establisemento sa patigayon ilabi na diha sa Central Public Market.
Alang niining bulan sa Pebrero 2015, laing pinansyal nga hinabang ang nadawat sa barangay gikan ni Governor Roberto Y. Uy sa kantidad nga mikabat P1.7 milyones alang sa pagpatapos sa pagtukod sa barangay hall.
Alayon sa panglantaw sa syudad nga mamahimong Center of Outdoor Sports dinhi sa habagatang bahin sa Mindanao sa tuig 2020, matud pa ni Diaz nga ang mga kawani sa Sangguniang Panlungsod ang nagapahigayon ug Clean-up ug beautification drive, sanglit nga usa kini sa mga proyekto sa maong buhatan. (CIO-MECC)

Share on: