Dakung garbo ug kalipay sa mga Barangay Chairmen ug mga Kagawad sa mga barangay sa Dipolog, human giila ang ilang mga paningkamot ug kakugi sa pag-implementar nila sa inisiyatibong “Maabi-abihong Dipolognon” sa Performance Governance System Program atol sa gipahigayung Awarding Ceremony sa Search for the Most Tourist-Friendly Barangay sa tuig 2014 kaniadtong Marso 20, 2015 didto sa Boulevard Complex 2.
Gi-ilang The Most Tourist-Friendly Barangay sa urban category nakamit sa Barangay Olingan ug sa rural category ang Barangay Cogon, nga nagpakadawat sa Plaque of Accreditation, mga proyekto nga mobalor ug P100,000.00 ug Accreditation Stickers.
Mismong si Mayor Evelyn T. Uy ug Atty. Chandler O. Ruiz, ang kasamtangang president sa City Tourism Council sa dakbayan, ang mihatag sa mga premyo ngadto sa hingtungdang Barangay Chairmen nga sila si Dr. Ofelia Acis sa Olingan, ug Kapitan Paquito Paňo sa Cogon lakip ang ilang mga Barangay Kagawads.
Dugang niini, aduna usay mga minor awards nga gipang-apod-apod ngadto sa mga sa Barangay sa Sangkol, Gulayon, ug Punta isip Tourist-Friendly sa rural category, samtang ang mga Barangay sa Central, Sta. Filomena ug Estaka ang giilang Tourist-Friendly sa urban category.
Giila usab ang mga Barangay Sta. Filomena ug Sangkol isip Most Clean and Orderly Barangay; ang Most Safe Barangay gihatag sa mga Barangay sa Estaka ug Sangkol; ug ang Most Congenial Barangay gihatag sa Barangays Galas ug Gulayon.
Ang tanang minor awardees nakadawat sa certificate of recognition ug accreditation stickers.
Gipasalamatan ni Mayor Evelyn Uy ang tanang mga barangay chairmen ug ilang mga kagawad gumikan sa ilang suporta ug kooperasyon ilabi na gayud sa hinay-hinay nga pagkab-ut sa dakbayan sa iyang panglantaw nga mamahimong Center for Outdoor Sports of the South sa tuig 2020. Ug midasig usab si Atty. Chandler Ruiz nga magmakanunayun ang ilang gipakitang kaasgut sa pagdumala sa ilang kabarangayan tungod ka yang programang Maabi-abihong Dipolognon makadugang sa pagpalambo dili lang sa dakbayan apan lakip usab ang tibook siyudad sa Dipolog. (CIO-prr)

Share on: