Nahimong malampuson ang pagpahigayon sa “BCPC (Barangay Council for the Protection of Children) Kamustahan” niadtong Hulyo 18, 2015 didto sa 4th Floor City Hall Building, Dipolog City uban sa kagamhanang lokal sa Dipolog , ZNFEPA ug sa buhatan sa Commission on Population IX.
Atol sa maong kalihukan, mihatag si Mayor Evelyn T. Uy sa iyang Welcome Message, diin mipasalamat kini ug daku ngadto ni PopCom IX Regional Director, Dir. Reynaldo O. Wong, gumikan sa adbokasiya kabahin sa pagplano sa pamilya ug ang pag-edukar sa mga kabatan-onan.
Nagkanayon si Mayor Uy, nga gikinahanglan ang ‘ teen center’ diha sa mga tulunghaan , diin nakaangkon na niini ang Dipolog City National High School sa barangay Barra, Galas National High School, Punta National High School ug Zamboanga del Norte National High School.
Sa mensahe ni City Councilor Atty. Jasmin N. Pinsoy nga duna’y upat ka isyo ang gikinahanglang tuki-on atol sa maong panagtigom, sama sa isyo kabahin sa (1) HIV/ AIDS, (2) Teenage Pregnancy, (3) Drugs, ug (4) Flesh Trading.
Matud pa ni Atty. Pinsoy nga gikinahanglan nga mahatagan ug pagtagad kining mga isyoha aron matabangan ang mga kabarangayan sa pagsulbad sa nasangpit nga suliran.
Nakasentro usab ang mga panudlo ni direktor Wong kabahin ‘Risky Sexual Behavior’ sa mga kabatanonan, diin ang pag-edukar lamang mao’y sulbad aron dili masugamak sa kaala-utan ang mga kabataan.
Matud pa ni Dir. Wong nga gumikan sa mga bag-ong teknolohiya karong sama sa mga cellphone, sa mga computers ug uban pang kagamitan, mas misamot na karon ang gidaghanon sa mga kabataan nga mas misaka ang gidaghanon nga nahimong suliran diha sa ilang katilingban.
Busa dugang pa ni Wong nga ang panag-uban sa PopCom, sa LGU, ug sa ZNFEPA usa ka dakung tabang alang sa kaugmaon sa mga kabataan ning dakbayan sa Dipolog. (CIO-MECC)

Share on: