Nagpasalamat ug daku si Mayor Evelyn T. Uy gumikan kay sa tanang dapit dinhi sa rehiyon 9, ang dakbayan sa Dipolog mao ang napili-an isip venue alang sa Board of Investment Roadshow diin gipresentar ang Investment Priorities Plan 2014- 2016, Industry Development for Inclusive Growth.
Nasayran nga nahimong malampuson ang pagpahigayon niini didto sa Ariana Hotel, Airport Road, Minaog, Dipolog City niadtong Hunyo 19, 2015.
Alayon sa maong kalihukan, si Mayor Uy mao ang nahimong Keynote Speaker, diin gitagsa-tagsa niini ug bat-bat ang pipila ka mga kalamboan dinhi sa dakbayan. Usa niini mao ang Corazon C. Aquino Memorial Hospital, ang mga proyekto kabahin sa turismo, ang mga produkto sa ‘Dipolog’s Best’, bottled sardines ug daghan pang uban.
Si Zamboanga del Norte DTI Provincial Director, Engr. Noel Bazan, ang mihatag usab sa iyang habig may kalabot sa mga patigayon dinhi sa lalawigan sa Zamboanga del Norte, diin gisaysay niini ang “6 Champion Products”, sama sa rubber, seaweeds, abbaca, lubi, mangga ug isda.
Si Manufacturing Industries Service, BOI Director, Ms. Evariste M. Cagatan, mao ang mipresentar sa Investment Priority Plan gikan sa tuig 2014-2016.
Nagkanayon si direktor Cagatan, sanglit nga usa ka nindot nga nasaud ang Pilipinas, busa makadani kini ug daghang imbestor nga mobubo sa ilang mga puhunan alang sa patigayon dinhi.
Mipresentar usab si NEDA Region IX Assistant Regional Director, Ms, Philorita A. Ridao kabahin sa Regional Economic Situation. Matud pa nga ang mga tinguha sa Zamboanga Peninsula Development Plan, mao ang Inclusive Growth, diin gikinahanglan nga mahilakip ang tanan. Dili lamang ang mga kuwartahan o ang mga dato ang maapil, kung dili lakip na usab ang mga pobre.
Ang tambag ni BOI Director, nga gikinahanglan nga ang lantawon mao ang malahutayon nga pagpamuhunan sa usa ka patigayon aron makapasiugda kini ug dugang trabaho alang sa mga katawhan. Usa kini ka pamaagi aron matabangan ang suliran sa kapobrehon ilabi na dinhi sa lalawigan. (CIO-MECC)

Share on: