Mitambong ang pipila ka mga personahe sa Social Security System atol sa regular nga sesyon sa konseho ning dakbayan niadtong nakalabay’ng Mayo 5, 2015 alang sa pag-awhag ngadto sa mga Contractual ug Job Order nga mga kawani sa City Hall alang sa pagpa-miyembro aron makapahimulos sa mga benepisyo nga madalit niini.
Sigun sa gipasabot si Dipolog-SSS Branch Manager, Ms. Cecil Cadavedo, nga ang SSS maoy usa ka korporasyon nga gipanag-iyahan ug gikontrolar sa gobyerno nga gimugna pinasubay sa Akta Republika numero 1161. Usa ka sugo sa balaod aron kahatagan ug Social Security Protection ang tanang kuwalipikadong Pilipino nga mamumuo.
Dugang pa niini, nasayran usab nga ang Expanded-SSS Program ang miha-om ngadto sa mga contractual ug mga job order nga mga kawani dinha sa LGU gumikan kay mahatagan naman unya sila sa tukmang ayuda isip mga kawani partikular na unya kon sila magkasakit, ma-balda, manganak(sa kaso sa mga inahan), kon sila ang moabot na sa ilang taas nga pangidaron, o bisan sa kamatayon, ug uban pang mga maayong pribilihiyo nga ilugway sa SSS ilawom sa nasangpit nga programa.
Sanglit nga dili permamente ang pagtrabaho sa gihisgutang kawani sa City Government, sila ang mahimong mo-rehistro isip Self-Employed Member ubos sa Social Security Law.
Dugang pa, nga aron mapadayon ang maong programa alang sa gihisgutang mga kawani sa Dipolog LGU, matud pa ni Cadavedo nga ang buhatan sa SSS ang gikinahanglang makig-kauban ngadto sa buhatan sa DILG alang sa katumanan sa maong katuyoan alang sa mga kawani nga contractual ug job order. (CIO-MECC)

Share on: