Bisan pa man sa kadaghan sa gi-atiman sa kagamhanang lokal sa dakbayan ilawom sa liderato ni Mayor Evelyn T. Uy, apan wala gihapon niini undangi ang pagpatuman sa nagkalain-laing mga gagmay ug dagkong proyekto alang sa mga katawhan.
Mao kini ang nasayran sa buhatan sa impormasyon basi sa binulan nga report gikan sa buhatan sa City Engineering, ning dakbayan nga gipetsahan ug Abril 30, ning tuiga.
Makita sa maong talaan ang mga nagkalain-laing proyekto nga padayong gipatuman sa dakbayan sama sa: 1) pagtukod sa 4-units CL 2-storey building sa Laoy, Relocation site; 2) pagtukod sa City Food Terminal 2 sa Barangay Miputak; 3) pagtukod sa Processing Building didto sa LSDEC, Galas; 4) pagtukod ug dugang Daycare Centers sa Barangay Galas ug Dicayas; 5) dugang pagtukod ug Olingan Health Center; ug uban pa, diin hangtud ning kasamtangan, padayong gitrabaho pinaagi na sa buhatan sa City Engineering, ning dakbayan.
Gawas pa niini, gipa-ilawom usab sa renovation ang Model Senior Citizens building, sa Barangay Sta. Isabel, alang sa mga edaran; pagtukod ug drainage canal subay sa dalan Osmena, ug pagkomponi sa pipila ka mga barangay roads dinhi palibot sa dakbayan.
Dugang pasalig sa kasamtangang liderato nga magapadayon ang pagbubo ug mga proyekto dinhi sa dakbayan, aron hiniusang mapahimuslan sa tanang mga katawhang Dipolognon.(CIO-alb)

Share on: