Usa ka semana nga kalihokan ang gipahigayon alang sa tanang mga Day Care Workers sa Dipolog alayon sa pagsaulog sa “Day Care Workers Week” sugod niadtong nakalabay’ng Hunyo 5 hangtud na sa petsa 11, ning tuiga.
Ang nasangpit nga okasyon ang nagdala sa temang “Day Care Workers: Sa Matapat, Mahusay at Magiliw na Paglilingkod, kakayahan at kagalingan nga mga Bata ay siguro!”. Kini gipasiugdahan sa City Social Welfare and Development Office sa pagpangulo ni Social Welfare Officer Nenita O. Maningo, duyog sa pakigtambayayong sa Federation of Day Care Workers Association.
Ang mga Day Care workers nakasinati ug misalmot sa lain-laing mga kalihokan sama sa field trip ngadto sa Barcelona Spring sa Barangay Barcelona , Dapitan City, sports tournament, parlor games, Day Care Worker Got Talent ug ang Search for Best Recycled Material/s outfit.
Gihatagan usab ug pasidungog pinaagi sa pagtunol ug plaque of appreciation ang mga day care workers nga meretiro na sa ilang pagserbisyo dinha sa mga Day Care Centers (DCC).
Ang mga day care worker retirees nailhan nga sila si Lolita Acas sa Purok Buli Minaog, Letecia M. Dimasuhid sa Purok Cacao, Minaog, Ester Recentes sa Sto. Nino Village, Dicayas, Nemesia Jauculan sa Sunrise, Barra, Arsenia Paluca sa Bougainvilla ug Love Green sa Barangay Miputak ug Evelyn Ferolino sa Bagacayan, Galas.
Ang kalihokan gitapos pinaagi sa pagpanglimyo sa baybayon gikan sa Baybay Surf padulong sa Baybay Galas, ning dakbayan. (CIO/ebp).

Share on: