Mapasigarbuhong mipagula ang mga miyembro sa Board sa Dipolog City Government Employees Multi-purpose Cooperative (DCGEMCO) sa kinatibuk-ang kita niini sa tuig 2014 nga mikabat sa kapin sa 2.2 milyones ka pesos gikan sa mga serbisyo nga gihatag niini sa mga miyembro sama sa merchandise store, pahulam, raffle tickets, service fees, insurance commission, interest on bank deposits ug uban pang matawag ug other income sa maong kooperatiba.
Gikan sa napatik nga kinatibuk-ang income nga P2,202,786.49, ang kinatibuk-ang operating expenses sama sa audit fees, surety bond, registration fees sa PHILGEPS, notarial fees, office ug store supplies, general assembly expense, scholar tuition fee ug mga honorarium sa board mikabat sa kapin sa 8 siyentos mil ka pesos lakip na sa pagpahat sa statutory funds sama sa general reserve fund, community development fund, optional fund ug CEFT, mokabat karon sa P931,546.88 ang kita sa DCGEMCO nga mamahimong ipang-apod-apod karon sa mga miyembro isip interest on capital (IOC) ug patronage refund (PR) atol sa ipahigayong general assembly karong tuiga.
Dugang pahibalo sa mga board of directors sa kooperatiba, nga sa serbisyo sa pahulam, mikabat sa kapin sa 4.7 milyones ka pesos ang na-release sa emergency loan; kapin sa 5 ka milyones ka pesos ang salary loans diin adunay kinatibuk-ang napahat ang kooperatiba sa mikabat kapin sa onse milyones ka pesos nga napahimuslan sa mga miyembro sa tuig 2014.
Gumikan niini nga kalambu-an, mapasalamatong mipabati ang mga miyembro sa board ngadto sa tanang miyembro sa DCGEMCO, sa paghatag sa ilang makanunayung suporta ngadto sa kooperatiba nga maoy nakapalambo niini. Mipabati usab sa ilang dakung pasalamat ang board ngadto kang Mayor Evelyn T. Uy, kinsa usa usab sa nakahatag ug dakung kalambu-an sa DCGEMCO gumikan sa pagpa-ambit sa mga proyekto sa kagamhanang lokal nga maserbisyuhan sa kooperatiba. (CIO-prr)

Share on: