Nahimong malampuson ang pagpahigayon sa paglusad sa “Dengue Awareness Month” niadtong Hunyo 11, 2015 didto sa Mibang Hotel ning dakbayan sa Dipolog nga gipasiugdahan sa City Health Office nga ubos sa pagdumala ni City Health Officer, Dr. Cecilio Siglos.
Ang tema alang niining tuiga mao ang “4 O’clock Habit: Stop, Look and Listen”.
Gi-awhag ni Sanitation Officer, Ariel Saldariega, nga gikinahanglan nga tan-awon ug susihon ang sulod ug gawas sa mga balay nga posibleng pangitlogan sa mga lamok. Lakip nga paga-susihon mao ang mga plorera, defrosting – pan sa refrigerator, aircon, gutter, tulaan sa manok, mga botelya, lata, ligid ug uban pang mga nakatambak dinha gawas sa atong mga balay.
Gi-awhag usab ang mga tagi-barangay alang sa pagpaminaw sa ilang mga opisyales sa barangay alang sa tukmang pamaagi sa pagsumpo sa lamok nga maoy nagdala sa dengue dinha sa matag dapit.
Kahibalo-an nga duna’y mikabat sa 105 ka kaso sa dengue ang natala sulod sa unang quarter ning kasamtangang tuig, Enero ngadto sa Marso 2015. Kasagaran niini ang anaa sa urban barangays diin kalagmitan niini mga magtutungha.
Aduna’y taas nga kaso sa dengue ang barangay Turno, sunod ang barangay Olingan, Estaka, Minaog ug Galas. Ang ubang barangay naa’y duha, samtang ang uban ang nagbaton lamang sa tagsa ka mga kaso.
Atol niining panagtigom, duna’y mikabat 50 ka ‘treated mosquito nets’ kon moskitero ang gipang-apod-apod ug 30 ka kahon sa Sumilarv nga mao’y itambal sa mga lim-aw palibot sa balay.
Aduna mikabat sa 117 ka mga partisipantes ang mitambong nga gilangkoban sa mga Punong Barangay, barangay kagawad nga Chairman sa Committee on Health, Barangay Health Workers, NGO- business sector, ang mga negosyante sa Dipolog Boulevard.
Gihangyo usab karon ang kooperasyon sa mga sektor sa patigayon alang sa pagpabitay ug mga tarpaulins kabahin sa Dengue Awareness Month aron masayran sa katawhang publiko nga misuporta ug miduyog usab sila sa nasangpit nga adbokasya. (CIO-MECC)

Share on: