Usa sa nakatabang ug daku nga nakasalmut alang sa kalambuan sa dakbayan, mao ang Dipolog Boulevard nga mao karon ang nahimong sentro sa ‘community events for leisure’, sports and wellness, entertainment, cultural heritage promotion, ug daghan pang uban. Tipik kini sa pamahayag sa inahan ning dakbayan Mayor Evelyn T. Uy atol sa gipahigayong SOCA niadtong Abril 14, 2015 didto sa Top Plaza Hotel.
Gumikan sa hugtanong ‘political will’ ug sinsiridad sa usa ka lider nga mahatagan ug kausaban ang kinabuhi sa iyang mga katawhan, busa nahimong mauswagon ang kinabuhi sa mikabat 500 ka panimalay nga kanhi nanimuyo sa baybayon sa pipila ka mga barangay dinhi sa dakbayan.
Kahibaloan nga ang Dipolog Boulevard mao karon ang nakadani sa pipila ka mga katawhan sa patigayon aron mao’y nahimong distrito sa negosyo dinhi sa dakbayan. Gani, duna na’y 15 ka patigayon ang gibuksan diha sa Twin Commercial Complex, diin kini ang gipanag-iyahan sa batan-on nga mga negosyante.
Gawas sa natampo nga dugang P5 milyones ka pesos isip tinuig nga income alang sa panudlanan sa siyudad pinaagi diha sa pagpa-abang sa commercial building, ang boulevard mao ang nakahatag sa malahutayong income ngadto sa mga micro-entrepreneur sama sa pagpamaligya ug balut, barbecue, prutas ug uban pa.
Lakip nga gi-asoy sa Mayora ang kabahin sa iyang pagpresentar sa iyang Success Story didto sa nasud sa Singapore atubangan sa ‘panel of urban international experts’, diin nakadayeg ang tanan gumikan sa katumanan sa maong proyekto.
Ang Philippine Political Science Association ang mihimo sa ilang panagtigum dinhi sa Dipolog ug kasagaran kanila ang nakasulti nga usa ka ‘perfect example of how local governments can innovate and forge collaborations to realize inclusive growth and felt development by the people’. Mao kini ang sugilanon alang niadtong 500 ka pamilya kinsang mga kinabuhi ang nausab human sila gipalalin gikan niining coastal slum nga mao na karon ang boulevard. (CIO-MECC)

Share on: