Lain na usab nga pasidungog alang sa mga Dipolognon ang gidawat ni Dipolog City Mayor Evelyn T. Uy kaniadtong Pebrero 20, 2015 didto sa Function Room 4, SMX Convention Center, Pasay City atol sa Gawad Kalusugan awarding ceremonies nga gipasiugdahan sa Department of Health (DOH) .
Nasayran nga ang dakbayan sa Dipolog nakadawat sa Red Orchid Award sa tuig 2011, 2012 ug 2013 busa nahimo kining hall of framer sa 2014 sa susamang kategorya.
Ang ganting tropeo ug tske nga nagkantidad Ph500,000.00 gitunol ni DOH Secretary Janette Loreto-Garin ngadto kang Mayor Uy uban nila ni City health Officer Dr. Cecilio Siglos, Liberty Sybico, Larry Padilla, Arvin Zerna, Leonor “Pinky” Rabino ug Konsehal Kenny Val Ong. Tumong sa Gawad Kalusugan Award ang pag-ila sa mga lokal nga kagamhanan sa tibuok nasud isip haligi sa kinatibuk-ang kahimsog sa panglawas .
Usa sa mga lakang nga gilantaw sa siyudad alang sa maayong panglawas sa mga Dipolognon mao ang pagpatuman sa ordinansa sa dakbayan numero 07-196 o “Anti-Smoking Ordinance of Dipolog”. Ang ordinansa nag lagda sa pagpanigarilyo sulod sa Dipolog City ug paghatag ug silot sa mga malapason niini.
Si Mayor Uy atol sa flag raising ceremony sa mga kawani sa siyudad mipasalamat sa mga Dipolognon nga misanong sa ordinansa ug usab sa mga personahe sa City Health Office ug uban pang buhatan nga gitahasan sa paglantaw ug pagpatuman sa nasangpit nga balaudnon. Iya usab nga gipahimunduman ang tanang kawani sa kadaot sa lawas resulta sa pagpanigarilyo ingon man sa dili manigarilyo nga maoy makahanggab sa aso nga gitawag ug “second-hand smoke”.
Ang “Anti-Smoking Ordinance of Dipolog” nag dili sa hingpit sa pagpanigarilyo sulod sa mga pribado ug publikong tulunghaan sa tanang ang-ang, sa mga ospital, buhatan sa panglawas, klikina ug barangay health centers, gasolinahan, ug industriyal gas ug mga establisimento.
Ang ordinansa nagadili usab sa pagpanigarilyo sulod sa mga pangpublikong sakyanan ug sa mga seradong lugar pangpubliko nga dunay gidak-on nga ubos sa 500 metro kwadrado.
Ang masakpan nga makalapas sa balaudnon dunay silot nga Ph1,000.00 sa unang paglapas, Php2,000.00 ug Ph3,000.00 sa ikaduha ug ikatulong kalapasan ug/o pagkabilanggo sa dili mokulang sa 3 ka adlaw apan dili molapas sa 6 ka adlaw sa paghuna-huna sa korte ug/o pagsirado sa pangpublikong lugar. (CIO/ebp).

Share on: