Isip pagpadangat sa kinasing-kasing nga pahasubo ngadto sa pamilya ni anhing Mr. Hiroshi Ikeda, kanhi director sa Organization for Industrial, Spiritual and Cultural Advancement (OISCA) sa Mindanao, usa ka resolusyon ang gipadas-ug sa Sangguniang Panlungsod (SP) sa Dipolog alang niini.
Ang SP resolusyon numero 14-470 gipetsahan Disyembre 16,2014 nga gipangamahanan ni konsehal Atty, James Cyril O. Ruiz nagpahayag sa kasubo sa mga sakop sa Sanggunian ug sa mga katawhan sa Dipolog sa pagtaliwan ni Mr. Hiroshi Ikeda. Ang resolusyon ilang gipadangat ngadto sa iyang pamilya pinaagi sa iyang biyuda nga si Mrs. Bernarda Balingit Ikeda.
Nasayran kang Mrs. Ikeda nga si Mr. Hiroshi Ikeda namatay didto sa Red Cross Hospital sa Tokyo, Japan kaniadtong Nobyembre 27,2014.
Dugang nasayran nga si Ikeda usa ka Japanese national nga taud-taud na nga nagpuyo dinhi sa dakbayan sa Dipolog uban sa iyang pamilya. Siya nahidangat sa nasud tungod sa iyang trabaho isip director sa OISCA sa Mindanao.
Pinaagi kang Ikeda ubay-ubay nga mga proyekto sa OISCA ang nahidangat sa dakbayan sa Dipolog ug nakatampo sa paglambo sa siyudad. Pipila sa iyang mga nahimong kabilin mao ang pagpananum ug mga kahoy didto sa Pamansalan , Diwan ug ang pagtukod sa children’s forest. Iya usab nga gihatagan ug dakong pagtagad ang pagtanum ug mga bakhaw sa pipila ka mga baybayong lugar sa Dipolog ug Dapitan.
Si Ikeda usab ang nagtukod sa OISCA Eco Technology Training Center nga nahimutang sa barangay Bacuyong sa lungsod sa Pi?an, Zamboanga del Norte.
Nahimo usab nga tulay si Ikeda alang sa maayong relasyon , kooperasyon ug panagdait sa pipila ka mga hapones ug mga Dipolognon.
Sa susamang kalamboan pipila usab ka mga Dipolognon ang napadala sa nasud sa Japan isip mga agricultural trainees /scholars pinaagi sa OISCA ang mipadayag sa ilang kasubo sa pagpanaw ni Mr. Ikeda . Sila mipasalamat kaniya sa mga kasinatian ug kaayuhan nga ilang natagamtaman pinaagi kaniya.
Gibiyaan ni Ikeda ang iyang asawa nga si Bernarda ug mga anak nga sila si Romel, Namyo, Dr. Yusico Ikeda-Maquiling, Medori ug Deisako Ikeda. (CIO/ebp).

Share on: