Mihatag karon ug dugang dungog ning atong dakbayan sa Dipolog ang “Dipolog Taekwondo Team Denkickers”, human kini ang nahimong “First Runner- Up” sa bag-ohay pa lang nga gipahigayong Regional Taekwondo Championship, niadtong nakalabay nga Marso 15, ning tuiga, didto sa 4th floor, Minpro City Mall, sa dakbayan sa Zamboanga.
Mao kini ang nasayran sa buhatan sa impormasyon sayo ning semanaha. Sigun sa dugang nasayran nga walo (8) sa mga miyembro niini ang malamposong nakakuha sa gold medals; duha (2) usab niini ang nakakuha sa Silver medals, samtang laing duha (2) ang nakakuha usab sa bronze medals.
Ang walo (8) nga nakakuha sa gold medals ang giilang sila si: Fritz Lucky Gronio, Chris John Olop, Julian Kris Armado, Angela Joy Barrios, Rhealyn Lorenzo, Mariah Mayonila, Ryan Luna ug Raily Kenchin.
Samtang ang malamposon usab nga nakakuha ug silver medals mao sila si Jhunel Romero ug Anthony Charles Ello, samtang ang laing duha mao sila si Rey Denielle Randa ug Karla Mae Arnado, kinsa nakakuha ug bronze.
Matud pa nga ang nasangpit nga taekwondo team ang gidumala nila ni Den M. Randa, Lyn N. Randa ug Dioscoro Ello, isip mga coaches.
Samtang sa laing bahin, kining nasangpit nga Dipolog Taekwondo Team Denkickers ang nagapahibalo karon nga kini ang mopahigayon ug “TAEKWONDO SUMMER CLINIC PROGRAM” nga magasugod karong Abril 6, ning tuiga, dinha sa Dipolog Pilot Demonstration School covered court. Alang sa dugang detalye kalabot niini, pakigkita-i lang si Ms. Lyn N. Randa.(CIO-alb)

Share on: