Alayon sa kasaulogan sa kasumaran sa ika-63 ka tuig ning lalawigan sa Zamboanga del Norte, gikan Hunyo 1-6, 2015, gibuksan na usab karon ang ‘Cocoville’ sa Dipolog Boulevard diin gihiklad na usab ang mga produktong Dipolog’s Best nga ginama ubos sa liderato ni Mayor Evelyn T. Uy.
Nasayran nga gidugukan sa mga katawhang dumuduong ang gihisgutang mga produkto sama sa Spanish sardines, Cassava-Squash-Moringa Chips, Sibuying, Pansit, Peanut Roll, Yemas, Sampalok Candy, Utap Biscuit, ug uban pa.
Nahimong kinaham ilabi na sa mga kabataan ug lakip sa mga hamtong ang maong mga produkto gumikan kay gibalik-balikan man kini. Gawas nga makaya ra ang presyo sa maong mga produkto, puno usab kini sa bitamina ug minerals diin maayo kini sa nutrisyon alang sa tanan.
Lakip nga gibaligya usab ang pipila ka organikong produktong utanon sama sa tambuali, paliya, kamatis ug uban pa. Lakip usab nga duna’y pipila ka mga prutas sama sa mangga, makupa ug tambis.
Lakip nga mibaligya ang PCA (Philippne Coconut Authority) sa ilang Coco-sugar diha sa cocoville nga gidugukan usab kini sa mga katawhan.
Sumala pa ni OIC-City Agriculturist, Engr. Kerr Porlas nga ang Dipolog’s Best nga mga produkto ang hinay-hinay nang nagka-uswag, busa gituho-an kini nga mamahimong income-generating nga proyekto alang sa mga Dipolognon. (CIO-MECC)

Share on: