Usa ka “Earthquake Drill” ang gipahigayon na usab dinhi sa usa sa mga tulunghaang elementarya kagahapong adlawa, Pebrero 4, 2015. Kining nasangpit nga drill ang dinha partikular gipahigayon sa Miputak Elementary School, diin gisugdan may kapin kon kulang alas 9:05 ang takna sa kabuntagon.
Sumala sa dugang nasayran gikan sa buhatan sa City Disaster Risk Reduction Management ilawom sa kasamtangang pagdumala ni Mr. Felipe Mangila, nga ang pagpahigayon ning maong kalihokan maoy tinuig nga pagahimoon sigun sa gimando sa Office of Civil Defense, ug tipik usab sa Disaster Preparedness Program sa kagamhanang lokal ning dakbayan ilawom sa pagdumala ni City Mayor Evelyn T. Uy, aron sa pagmugna ug makanunayong pagpakabana ngadto sa atong mga katawhan kalabot na sa mga kalamidad, aron sila katudlo-an sa ilang angayan nga paga-buhaton panahon sa aktwal gayud nga panghitabo.
Ang maong earthquake drill ang gipahigayon duyog na sa pagsaksi sa mga personahe nga gilangkoban sa nagkalain-laing buhatan ug ahensiya sa kagamhanan, isip mga “panel of evaluators o observers”. Ang mga hut-ong sa mga evaluators ang gilangkoban nila ni: F/Sr. Inpstr. Richard Timosa,- BFP; Mrs. Lerma Campaner – DILG, Dipolog; Mrs. Mercedita Clamohoy – CSWD; Mrs. Jovencia Samante – DepEd, Disaster coordinator, PIA Manager, Alfonso Ruda, Mrs. Carlou Tababan, – PHILVOLCS ug Mr. Alan Francisco L. Bengua, sa City Information Office, tanan ning dakbayan.
Sigun sa kinatibuk-ang resulta sa nasangpit nga earthquake drill, nakita sa mga evaluators nga nasanay na ang mga kabataang magtutungha sa ilang paga-buhaton panahon nga adunay linog nga mahitabo, natural uban sa pag-gabay sa ilang mga magtutudlo. Nahimong hapsay ang ilang paghimo sa “duck-cover & evacuate’ strategy ug ingon usab sa hapsay nga pag-evacuate padulong ngadto sa gidesignar nga evacuation area sa ilang tulunghaan.
Tungod ni maong kalamboan, nahimu-ot ug gikalipay sa mga evaluators ingon man sa mga magtutudlo sa Miputak Elementary School kining maong talan-awon, gumikan kay tataw kayo nga masabot nga nakakat-on na ang mga kabataan.
Gumikan niini, mipa-abot sa ilang mainitong pasalamat ang principal ug mga magtutudlo sa nasangpit nga tulunghaan ngadto sa mga evaluators, ug labaw sa tanan ngadto kang City Mayor Evelyn T. Uy, gumikan sa pagpahigayon ning nasangpit nga kalihokan dinha sa ilang tulunghaan. (CIO-alb)

Share on: