Mahidangat dinhi sa dakbayan sa Dipolog karong adlawa Biernes, Hunyo 19 ang 16 ka mga sakop sa Boodlers and Bikers Club (BBC) gikan sa kaulohang Manila.
Ang BBC usa ka grupo sa mga mahiligon magbesikleta nga gilangkoban sa 25 ka mga miembro. Kadaghanan kanila mga retiradong sundalo ug pulis ug pipila ka mga negosyanteng higala.
Ang mga sakop sa BBC nga mahidangat sa Dipolog gilangkuban nila ni Gen. Alex Yano(Ret), Gen Bong Ibrado (Ret), LtGen Rod Maclang (Ret), BGen Dick Morales (Ret), Col Joe Ongchangco (Ret) , Col Flor Lustina (Ret), ug PDir Abner Cabalquinto (Ret).
Uban usab kanila sila si Pancho Rodriguez, Elson Dagondon, Bing Favis, Bob Robles, Rollie Maliksi, Nelson Armamento, Espee Ongchanco, Edith Morales ug Karen Cabalquinto.
Ang grupo gitakda nga mobisita sa Silawe Central School, Barangay Silawe sa Lungsod sa Polanco ning lalawigan sa Zamboanga del Norte aron sa pagpanghatag ug mga school supplies sa 200 ka mga Grade 1 ug 2 pupils, lakip na niini ang mga batang tinun-an sa mga silinganang tulunghaan sa barangay Sianib, Lapayang Baha ug new Lebangon.
Sa ikaduhang adlaw ang rota sa BBC mao ang Dipolog- Polanco – Piñan ug stop over sa 101st Infantry Brigade . Moadto usab sila sa dakbayan sa Dapitan aron sa pagbisita sa mga tourist spots didto sama sa Rizal Shrine, Ilihan Hills, St. James Church , pasalubong centers ug uban pa.
Pagkagabii sa susamang adlaw, ang grupo makig salo salo kang Dipolog City Mayor Evelyn T. Uy ug mosuroy sa boulevard sa dakbayan.
Tumong sa BBC bike tours mao ang pag lingaw-lingaw ug ehersisyo samtang nag bisekleta, paglantaw sa mga tourist attractions ug ang pagtilaw sa mga pagkaun sa usa ka lugar.(CIO/ebp).

Share on: