Alayon sa pagpakita ug simpatiya ngadto sa 44 ka PNP-SAF nga nangamatay atol sa nahitabong police operation didto sa Maguindanao, mipakanaog si Presidente Benigno C. Aquino III ug orden nga nag-deklarar sa Enero 30, karong tuiga isip “Day of Mourning”.
Kahibalo-an nga lakip nga misimpatiya ang kapolisan ning dakbayan sa Dipolog nga gipangulohan ni P/Supt. Ranie Hachuela, uban ang Provincial Police Command nga gipangulohan usab ni Zamboanga del Norte Police Provincial Director, P/SSupt. Juanito Echaluce Enguera.
Lakip nga mipakita sa ilang simpatiya ang Philippine National Police Academy Alumni Association, Inc., ZN Chapter, nga gipanguloan sa Presidente niini nga si PCI Rolando Barraquio.
Lakip nga misimpatiya mao usab ang ubang ahensya sa gobyerno, sama sa Bureau of Jail Management and Penology (BJMP), Bureau of Fire Protection (BFP), ug lakip ang pipila ka mga personahe sa 101st Infantry Brigade.
Nasayran nga ang maong ‘Walk for Sympathy’ ang gisugdan didto sa Sta. Cruz Altar sa barangay Central ug padulong ngadto sa Holy Rosary Cathedral diin usa ka misa ang gihalad alang ngadto sa mga pulis nga nangamatay.
Matud pa ni PCI Baraquio, nga 90 % nga nakaila siya sa nangamatay nga kanhi kauban niyang SAF (Special Action Force). Nasayod usab siya nga lunsay’ng trabaho ug dedikado sa ilang propesyon kadtong mga pulisa nga nangamatay ug dili tinuod ang mga panagduda sa mga katawhan karon, nga gumikan sa kuwarta lamang busa nga mikuyog sila sa maong misyon. Nakahuna-huna lamang sila sama niana gumikan sa nabani-og nga gihanyag nga reward sa nasud sa America nga gipatong alang sa ulo ni Marwan kung madakpan kini.
Nagkanayon si Baraquio nga gi-andam na daan ang kahanas niadtong mga kauban niyang SAF alang sa guera ug ubang mga taktika sa pagpakig-away batok sa mga rebelde ug sa ubang matang sa kriminalidad.
Dugang pa, nga dugay nang panahon nga anaa sa ‘target list’ sa kapolisan sa nasud ang kabahin ni Marwan isip usa ka ‘international terrorist’. Mikabat na usab sa lima ka higayon nga mipahigayon ang kapolisan ug operation aron masikop ang ilang target, diin mao kini karon ang ika-lima ka higayon.
Ang nasangpit nga operasyon didto sa Mamasapano, Maguindanao, matud pa, usa ka ‘Special Mission’ kon ‘Operational Secrecy’, busa dili kini ginapahibalo ngadto sa ubang ahensya sa giobyerno. Bisan ang ilang kaugalingong pamilya dili usab nila pahibaw-on. Sanglit nga usa man kini ka special mission matud pa ni PCI Baraquio nga ilang gisalig na lamang ngadto ni OIC-Police Deputy Director General- Leonardo Espina.
Panapos pa ni Baraquio nga masiguro lamang kung si Marwan ba ang nakuha ug gipatay, human nga mogawas na ang resulta sa DNA test, diin hulaton pa kini sulod sa pipila ka semana o bulan pa. (CIO-MECC)

Share on: