Nunot sa gikatakdang pagpahigayon sa “3rd National Triathlon Competition” dinhi sa dakbayan karong umaabot adlaw’ng Sabado (Mayo 9) ug Domingo (Mayo 10) ning tuiga, usa ka temporaryong pagsira sa nasudnong dalan, gikan sa dalan Velasco ug Quezon Avenue junction ngadto na sa Barangay Olingan, partikular sa Dipolog City Sports Center, ning dakbayan, gikan sa alas 7:00 ang takna sa buntag ngadto na sa alas 11:00 ang takna sa udto sa Mayo 10, (Domingo).
Kini ang temporaryong isirado ngadto sa tanang motorista, gumikan kay kining naasoy’ng rota ang paga-gamiton sa mga siklesta nga misalmot sa nasangpit nga paugnat sa kusog. Sama sa nanglabay’ng duha ka mga tuig, diin kining maong matang sa paugnat sa kusog ang gipahigayon na dinhi sa dakbayan.
Gipaklaro ni Atty. Chandler O. Ruiz, ang kasamtangang chairman sa Dipolog City Youth Sports Development Council, nga nunot sa temporaryong pagsira sa nahisgotang rota sa unahan, aduna usa’y temporaryong re-routing alang sa tanang mga sakyanan nga mosulod ug mogawas dinhi sa dakbayan.
Subay ning maong kalambo-an, kinasing-kasing karong gihangyo ang tanang mga katawhan ug dumuduong ning dakbayan sa pagsabot ning maong tumong, ug hinoon sa pagsuporta pinaagi sa pagsaksi ning maong kalihokan nga molungtad lamang ug pipila ka mga takna sa Mayo 10, 2015.
Labaw sa tanan gihangyo kadtong mga nagpuyo daplin sa nahisgotang nasudnong dalan sa paglikay sa pagtabok-tabok sa maong dalan atol sa pagpahigayon sa cycling, ug ingon usab sa pag-parada sa bisan unsang mga sakyanan, pagbutang ug mga strakturang makahatag ug balda sa mga moaging siklesta, lakip na sa temporaryong paghipos usab sa mga layaw nga hayop, partikular na sa mga iro, baboy, iring, baka, kabaw ug uban pa, aron hingpit natong malikayan ang bisan unsa unyang disgrasya bunga sa atong pagpasagad.
Hinoon, gipasalig usab sa mga organizers nga human sa maong dula, buksan ra usab dayon pagbalik ang nahisgotang nasudnong dalan ngadto sa publiko.
Ang dula sa triathlon ang paga-langkoban sa mga dulang swimming, running ug cycling, diin aduna kini duha ka mga kategoriya nga mao ang: Mayo 9 – (Kids) ug Mayo 10 (adults). (CIO-alb)

Share on: