Ang lokal nga buhatan sa City Disaster Risk Reduction and Management dinhi sa dakbayan ang hugtanon na usab nga gapahibalo ngadto sa tanang mga katawhan, partikular na kadtong anaa nagpuyo sa mga gitawag ug “calamity prone area” sa pagbaton sa tumang pagbantay sulod ning mga panahona.
Sumala pa ni Mr. Felipe Mangila, ang kasamtangang hepe sa nasangpit nga buhatan, nga gumikan ning pag-punay ug ulan karong panahona gumikan sa hanging amihan nga nagdala ug ulan, angayan gayud nga magbantay-bantay ang atong mga kaigsoonan, ilabi na kadtong nagpuyo haduol sa mga suba, sapa batok na sa posible unya nga pagsaka sa tubig, ug sa mga kabuntoran nga padayong mohumok ug mo-resulta ngadto sa landslide.
Dugang pa niini, nga bisan pa man nga wala kita’y nasinati nga bagyo o “Low Pressure Area”, apan gumikan sa hanging amihan nga nagdala ug ulan, busa padayon kitang nakasinati ug tumang pag-ulan hangtud ning pagbalita.
Dugang usab nga gipaklaro ni Mangila nga aron malikayan nato ang dili maayong panghitabo, mas maayo nga magmabinantayon kita sa mga panahong susama niini, ilabi na sa panahon sa kagabhi-on.
Ang matud pa pagsige pag-ulan ang makamugna ug mga pagbaha o lanab, gumikan sa kalit nga pag-usbaw sa gidaghanon sa tubig nga dala sa ulan, ug sa pagresulta usab ug mga landslides gumikan sa pagka-humok sa yuta gumikan sa tubig ulan.
Busa aron malikayan nato ang mga insidente nga nahisgotan sa unahan, mas gi-awhagan ang tanan sa pagbantay, ilabi na panahon sa kagabhi-on, partikular na kadtong anaa haduol sa mga suba ug sapa, lakip na usab ang anaa sa mga kabuntoran.(CIO-alb)

Share on: