Midawat na usab ug laing pasidungog ang dakbayan sa Dipolog pinaagi ni Mayor Evelyn T. Uy atol sa “Achievers of 2015” awarding ceremony nga gitanyag sa kagamhanang probinsyal sa Zamboanga del Norte kaniadtong Huwebes, Hunyo 4 didto sa Function Hall, Boulevard Commercial Building A ning siyudad.
Ang award gihatag ngadto sa Dipolog ubos sa Local Government Unit (LGU) category tungod sa mga nagsunod-sunod nga mga nadawat nga pasidungog sa siyudad sama sa 2015 Finalist – National Awards for Child-Friendly City, 2015 Performance Governance System Proficient Stage, ug Red Orchid Award 2012, 2013 ug 2014 ug Red Orchid Hall of Famer sa 2015.
Si Mayor Uy nagpasalamat sa kagamhanang probinsyal sa Zamboanga del Norte sa pagpangulo ni Gobernador Roberto Uy sa pagpili sa Dipolog –LGU nga mahimong awardee sa lalawigan karong tuiga.
Si Uy midugang nga ang mga kalampusan sa dakbayan parte usab sa kalamboan sa lalawigan . Ang mayora nanghinaot nga unta mahimo kining inspirasyon ug panig-ingnan sa ubang mga lungsod sa lalawigan .
Nasayran nga ang nasangpit nga kalihokan gimugna sa kagamhanang probinsyal sa Zamboanga del Norte lambigit sa pagsaulog sa ika 63 ka tuig nga kasumaran sa pagkahimugso sa lalawigan . Naghatag kini ug pasidungog sa mga kawani sa probinsya nga nagserbisyo sa lalawigan sulod sa 25 ka tuig, sa mga retirado ug sa mga mitaliwan karong tuiga.
Midawat usab ug awards sa individual category sila si Bishop Severo C. Caermare nga girepresentahan ni Rev. Fr. Enrico Montano ug Judge Silvino T. Pampilo, Jr. alang sa individual category ug ang Provincial Agricultural and Fishery Council sa association category.
Lakip usab nga giila ang mga pribadong organisasyon nga mihatag sa ilang suporta ngadto sa probinsya ilabi na ang kabahin sa pagpalambo sa edukasyon sa mga kabataan.
Ang awarding gipahigayon nila ni Gobernador Uy, Bise Gobernador Senen Angeles , Human Resource and Management Office Chief Ms. Aurelia ug Atty. Norberto L. Denura, Chairman, 2015 Achiever’s Awards Committee . (CIO/ebp).

Share on: