Migula karon atol sa gipahigayong regular nga panagtigum sa Solid Waste Management Board sa kagamhanang lokal sa Dipolog nga nagkinahanglan ang dakbayan ug dugang nga ekipo alang sa pagmintinar sa pagdumala niini sa mga basura.
Nasayran nga bisan pa man sa padayong pagkolekta sa mga basura sa urban ug semi-urban barangays sa dakbayan ug didto i-deposito sa controlled dump site sa dakbayan, apan nakita karon nga gikinahanglan ang dugang nga ekipo sama sa bulldozer ug payloader, aron makamit ang tinguha sa kagamhanang lokal, nga madumala ang paglabay sa basura nga dili maapektuhan ang palibot sa dumpsite ug ang kina-iyahan, sa kinatibuk-an.
Dugang gituki sa maong panagtigum mao ang pag-instalar sa washing area sa mga dump truck nga gakolekta ug basura didto mismo sa dumpsite; ang pagtanum sa African Tulips sa mga utlanan sa dumpsite; ang padayung pagsagup sa “recycling” sa mga plastic nga mga butang, pagtanum sa mga utanun; ug ang padayung implementasyon sa “No Segregation, No Collection Policy”.
Kahibalo-an nga sa kasamtangan, ang gidaghanun sa basura nga makolekta sa mga basurero dinhi sa urban ug semi-urban barangays sa dakbayan mi-abot sa 33.9 ka tonilada matag adlaw, diin 64% niin naglangkob sa highly biodegradable; 15% maoy highly compostable; 9% sa highly inert nga naglangkob sa mga botelya ug ubang mabu-ak nga basura; ug 12% nga naglangkob sa residual waste. Gani, ang basura nga makolekta sa atong kamerkaduhan naglangkob sa 1.5 tons matag adlaw ug 99% niini naglangkob sa biodegradable.
Gumikan niini nga detalye, migula sa assessment sa SWM Board nga kontrolado na ang estado sa atong basura dinhi sa dakbayan apan mipahimangno ang SWMB nga ipadayon nato ang pag-segregate sa atong basura aron dili nato masinati ang problema unya sa paglabay sa atong basura. (CIO-prr)

Share on: