Laing dungog na usab ang naangkon sa Dipolog City human giila ang grupo sa mga magtututngha gikan sa Zamboanga del Norte National Highschool- Special Program for the Arts (ZNNHS-SPA), nga regional winner sa bag-ohay lang nga gipahigayung LIKHAWITAN, nga didto gipahagayon sa Kabasalan, Zamboanga Sibugay niadtong Marso 20, 2015.
Atol sa pakighinabi sa trainor-coach nga si Ms. Gail Josephine P. Bustillo, magtutudlo sa ZNNHS-SPA, ang ilang gisalmutan mao ang Regional Festival of Talents – Original Pilipino Music (OPM) Songwriting Competition nga gipangunahan sa Department of Education nga naglangkob sa mga magtutungha sa sekondariya sa tibook rehiyon 9.
Dugang nasayran nga ang grupong magtutungha sa ZNNHS-SPA mimugna sa mga “lyrics” sa kanta ug ila kining gihatagan ug interpretasyon pinaagi sa pagkanta niini. Ang titulo sa ilang OPM songwriting mao ang “Noon at Ngayon”, ug gilangkuban ang grupo nila ni Kent Giel Encarnacion, ang composer ug sa mga performers niini nga sila si: Mary Ann E. Cabalida, Vienne Micha D. Tuazon, Honey Rose M. Banquiao, Clint John Enero ug mismo si Kent Giel Encarnacion.
Nakamit sa mga magtutunghang representante sa Pagadi-an City ang ikaduhang dapit ug ang ikatulong dapit nakuha sa mga magtutunghang representante sa Zamboanga City.
Sa kasamtangan, gipangandaman na sa magtutungha sa ZNNHS-SPA ang pagsalmot nila isip representante karon sa Region 9 sa national level competition sa LIKHAWITAN.
Gipasalamatan sa mga magtutungha ug sa ilang trainor-coach si Mayor Evelyn T. Uy ug Governor Roberto Y. Uy nga mihatag kanila ug moral ug logistical support nga dugang nakadasig kanila sa pagsalmut sa maong kompetisyon. (CIO-prr)

Share on: