Gipangandaman na usab sa kagamhanang lokal sa Dipolog inubanan sa pakigtambayayong sa Ta Galibon Ini Lady Art Collective ang pagpahigayon sa ika 6 ka tuig na nga Indigenous Art Exhibit nga gipangunahan sa Kalinawa Art Foundation

Kahibalo-an nga ang Kalinawa Art Foundation, usa ka Canadian-based foundation nga namugna ni Mr. David Gilinsky, usa ka pilantropo diin ang tumong mao ang pagpalambo sa mga musika, kultura ug visual arts sa mga indigenous people sa usa ka lugar aron mapatunhay ug mapreserbar ang cultural heritage sa usa ka komunidad o lugar.

Sukad niadtong tuig 2007 diin napahigayon ang unang Kalinawa Arts Exhibition dinhi sa dakbayan sa Dipolog, nakita ang daghanang talento sa mga indigenous nga mga grupo nga misalmot sa among kalihokan nga nagagikan, dili lang dinhi sa dakbayan apan lakip usab sa ubang munisipalidad ning probinsiya.

Karong tuiga, gipangandaman sa kagamhanang lokal sa Dipolog, Kalinawa Art Foundation ug mga kaubang lokal nga mga artists sa dakbayan nga mamahimong mabulukon ang pagpahigayon sa ika 6 ka tuig nga indigenous art exhibit, isip usa sa mga kalihokan alayon sa centennial founding celebration sa Dipolog karong umaabot Hulyo 1, 2013.

Gitakdang moabot sa 100 ka mga indigenous artworks o artifacts ang makitang ipasundayag sa exhibit area, ug aduna usay ipasundayag nga mga cultural dances ug pagtukar sa mga indigenous nga mga musika aron sa paghatag ug bulok sa nasangpit nga kalihokan. (CIO-prr)

Posted on September 13, 2012 - 10:54:55 AM

Share |

Dipolog City News