Si Dipolog City Mayor Evelyn T. Uy midayeg sa pwersa sa kapulisan sa dakbayan gipangulohan ni Acting Chief of Police, Superintendent Rani Planilla Hachuela sa ilang hinanaling tubag sa kasong murder dinhi sa siyudad nga misangpot sa pag aresto sa usa ka Australian national nga suspetsado sa pagbuhat sa krimen.
Sa espesyal nga sulat report nga gipadangat sa Dipolog City Police Station ngadto sa Zamboanga del Norte Provincial Police Office nasayran nga sa may alas 11:30 kapin kun kulang sa buntag sa Pebrero 1,2015, ang mga elemento sa Dipolog City Police Station gipangulohan ni Police Superintendent Ranie P. Hachuela uban ang mga elemento sa Zamboanga del Norte Criminal Investigation and Detective Group 9ZC-CIDG) gipangulohan ni PCI Heryl L. Bruno ug Dumaguete City Police Station gipangulohan ni Police Superintendent James T. Goforth, CIDG Negros Oriental gipangulohan ni PSI Muhammad Jamiri ug uban pang mga hingtungdang ahensiya , misikop sa usa ka Ali Ali didto sa Flores Avenue, Barangay Looc, Dumaguete City. Base sa mga dokumento nga nakuha sa mga pulis, si Ali Ali usa ka Australian national nga dunay postal address sa Number 6 Dunbar CRT, Keilor Downs, Victoria, Melbourne, Australia.
Si Ali suspetsado sa pagpatay sa usa ka Allona B. Alvarez, kinsa nakaplagang wala nay kinabuhi sulod sa lawak sa Antonio’s Pension House nga nahimutang sa Martinez St., Central Barangay, Dipolog City kaniadtong Enero 30,2015. Si Alvarez usa ka 17 anyos nga estudyante nga taga Barangay Bago, Sindangan, Zamboanga del Norte .
Human sa pag-aresto sa Dumaguete City, ang suspetsado gidala pag balik sa Dipolog City ug ngadto sa Zamboanga del Norte Medical Center alang sa medical check-up ug pagpatambal sa mga bun-og niini ug dayon ngadto sa Dipolog City Police Station alang sa pag detene kaniya samtang nagpaabot sa giaandam nga kaso batok kaniya.
Niining bag-ong kalampusan, si Mayor Uy midasig sa mga sakop sa Dipolog City Police Station sa pagpadayon sa ilang pagbantay ug pagpahingusog sa ilang paningkamot sa pagbatok sa tanang matang sa kriminalidad sa dakbayan. (CIO/ebp).

Share on: