Mipaabot sa iyang kinasing-kasing nga pagpasalamat si City Mayor Evelyn T. Uy ngadto sa tanang mitambong sa iyang “STATE OF THE CITY ADDRESS” kaniadtong nakalabay nga adlaw’ng Martes, Abril 14, 2015, didto sa Atrium, Top Plaza Hotel, ning dakbayan.
Sumala pa sa nasayran, kining maong pagpasalamat nga gipaabot sa inahan ning dakbayan gumikan kay iyang nakita ang bug-os nga suporta gikan sa nagkalain-laing sektor sa katilingban pinaagi sa pagtambong ngadto sa maong dakong kalihokan.
Pipila ka mga dagkong personalidad gikan sa mga nagkalain-laing ahensiya sa kagamhanan, ug sa mga pribado ug sibikong mga kahugpungan. Ang nasangpit nga kalihokan ang gitambongan sa mga kawani sa kagamhanang probinsiyal pinangunahan mismo nila ni Gov. Roberto Y. Uy, Vice Gov. Senen O. Angeles ug mga bokales ning lalawigan.
Lakip usab sa gipasalamatan mao ang mga dagkong opisyal sa atong mga otoridad sama nila ni 101st Brigade Commanding Officer, Col. Jesus A. Mananquil Jr, uban sa iyang mga opisyales, Dipolog City Chief of Police, P/Supt. Ranie Hachuela, ug uban pang hepe sa pipila ka mga kadagkuan sa mga pribadong kahugpungan, ug mga dagkong personalidad gikan sa nagkalain-laing sektor sa katilingban, lakip na usab sa mga hepe ug kawani sa kagamhanang lokal sa Dipolog.
Gani, sa pag-usab sa tipik sa mensahe sa inahan ning dakbayan, siya nagkanayon nga sa sulod sa iyang diyotay nalang nga nahibiling mga adlaw nga pagpangalagad isip Mayor ning atong dakbayan, iyang panigurohon nga ang nahibling usa ka tuig, siya ang magabilin ug legasiya sa “GOOD GOVERNANCE ug INCLUSIVE GROWTH”, uban sa pagpanghinaut nga unta ang bug-os nga suporta nga gilugway sa tanang Dipolognon ang magapadayon tungod ug alang sa dugang paglambo ni atong dakbayan.(CIO-alb)

Share on: