Nahibalik na sa dakbayan sa Dipolog ang mokabat 90 ka mga batan-on human mipailawon sa Youth Development and Leadership Adventure Program didto sa Ramon Aboitiz Foundation, Inc. (RAFI), Kool Adventure Camp (KAC) , Adventure Education Center sa Cansomoroy, Balamban,Cebu kaniadtong Abril 13-15, 2015.
Nasayran kang Junrie G. Papon usa sa mga partisipante sa KAC ug youth leader sa Barangay Diwan nga ang mga partisipante naggikan sa lain-laing barangay sa Dipolog ug sa mga lungsod sulod sa lalawigan sa Zamboanga del Norte.
Tumong sa 3 ka adlaw nga leadership program ang pagmugna ug usa ka makalingaw nga mga kalihokan alang sa personal nga paglambo ug himsog nga pagbinayloay sa mga partisipante.
Lakip usab niini ang paghatag ug higayon aron mapalambo ang ilang pagsalig sa kaugalingon ug mapalambo ang lawom nga pag-ila sa kaugalingon . Ang ikatulo nga tumong mao ang pagpalig-on sa personal nga katakus nga gikinahanglan alang sa usa ka epektibong liderato.
Si Papon nagpasalamat kang Dipolog City Mayor Evelyn T. Uy sa higayon ug suporta nga gilugway sa dakbayan ngadto kanila.
Matud pa ni Papon nga daghan ang iyang nakat-unan sa KAC aron mas mapalambo ang iyang kaugalingon . Siya nagplano sa pagpaambit sa iyang bag-ong kasinati-an ug kahibalo ngadto sa ubang kabataan sa iyang barangay.(CIO/ebp).

Share on: