Nakaangkon ug dakong pagdayeg ang dakbayan sa Dipolog gikan sa mga bisitang Russian nationals nga gipangulohan ni Hon Aleksie Vladimirovich Cherezov ang hepe sa Parnas Municipal District sa St. Petersburg, Russia nga miduaw sa siyudad kaniadtong Enero 28-30 ning tuiga.
Sa press briefing nga gipahigayon kaniadtong Huwebes sa hapon didto sa Top Plaza Hotel si Cherezov mipadayag sa iyang pagdayig sa katakus sa Dipolog Community Rondalla human nga iyang nadungog ang pipila ka mga musical renditions sa naulahi atol sa programa sa pagpirmahay sa sisterhood agreement sa Dipolog City ug Parnas Municipal District.
.
Nasayran kang Cherezov nga ilawom sa sisterhood agreement usa sa mga unang hatagan ug pagtagad mao ang natad sa arte ug kultura. Siya nagkanayon nga sa mga umaabot nga panahon dunay mga art exchanges o panagbayloay sa mga talento sa mga arte ug kultura sa 2 ka siyudad.
Si Mayor Uy midason usab sa pamahayag ni Cherezov. Siya mibutyag nga ang mga Dipolognon nagbaton ug daghang abilidad ug hiyas sa lain-laing natad sa arte ug angayan nga ipasundayag kini nga mga talent sa laing nasud.
Si Uy midugang nga ang panag-igsoonay sa dakbayan sa Dipolog ug Parnas Municipal District makapalig-on sa panaghigala ug hiniusang pagsinabtanay pinaagi sa pakigbaylo sa siyensya ug teknolohiya, arte ug kultura, turismo, edukasyon, paugnat sa kusog , komersiyo ug uban pa.
Sa susamang higayon si Russian Trade Counsellor sa Embassy of Russia sa Pilipinas Andrey Sapozhnikov mihatag usab sa iyang namatikdan nga kalimpyo sa Dipolog. Siya nagkanayon nga sa iyang hamubo nga pagbisita dinhi iyang nakita ang kaanindot ug kahapsay sa boulevard ingon man ang kabaybayonan dinhi.
Ang press briefing gitambongan usab nila ni Consul Armi Lopez-Garcia (Honorary Consul of Russian Federation) . Si Garcia mao’y usa sa mga instrumento nga namugna ang sisterhood agreement sa 2 ka dakbayan. Uban usab kanila si Elena Sergeeva ang executive assistant sa deputy of parliament member Hon. Evgeny Marchenko. (CIO/ebp).

Share on: