Usa ka Barangay Assembly Day ang gipahigayon sa Barangay Turno, Dipolog City kaniadtong Sabado Marso 28 didto sa barangay hall sa nasangpit nga lugar.
Gipangulohan ni Barangay Chairman Maynard R. Baes ug mga sakop sa konseho sa barangay ang tigom gitambongan sa lain-laing hut-ong sa mga lumolopyo sa nasangpit nga lugar.
Atol sa tigom si Chairman Baes mipahibalo sa katawhan sa mga nahimong programa ug proyekto sa barangay ilabi na ang pagpasemento sa mga dalan sa mga purok , dugang nga mga drainage canals ug uban pang proyektong pang inprastraktura.
Nasayran nga sa dili madugay sugdan na ang pagtukod sa Phase I sa Turno mini-gymnasium nga nahimutang atbang ra usab sa barangay hall. Ang mini-gymnasium nagkantidad ug 17milyones ka pesos.
Ang pasiunang pondo alang sa Phase I o initial construction maggikan sa Barangay sa kantidad nga 1.5M ug laing 1.5M gikan sa ZN 2nd District Congressional Office ni Congressman LabadLabad . Lain usab nga 6 milyones ka pesos ang maggikan sa Provincial Government of Zamboanga del Norte sa pagpangulo ni Governor Roberto Uy ug sa City Government of Dipolog sa pagdumala ni Mayor Evelyn Uy.
Sentro usab sa tigom ang kabahin sa pagpangandam sa mga katalagman, ang pagdumala sa mga basura , adopt-an-estero program, mga programa kabahin sa health ug nutrition, kabataan ug kababayen-an.
Lakip usab nga gihatag ug importansya ang sektor sa agrikultura ug panginabuhian, edukasyon ug natad sa paugnat sa kusog ug ang kahapsay ug kalinaw.
Mihatag sa ilang report sa katawhan sila si Konsehal Jimmy Baes sa Appropriation ug Finance, Ramonito Barbaso sa Women and Family, Edgardo Cohena sa Infrastructure and Development ug Agriculture and Cooperative, Randel Manificiar sa Peace and Order, Joel Velasco alang sa Youth angd Sports Development ug Ways and Means.
Didto usab si Ms. Flores Guidance Counselor sa Zamboanga del Norte National High School (ZNNHS) Annex nga nahimutang sa Barangay Turno aron sa pagkonsulta sa katawhan kabahin sa plano sa Department of Education (DepEd) sa paglain sa ZNNHS annex gikan sa ZNNHS main campus .
Ang maong balita ug konsultasyon ang naka-angkon ug positibong resulta gikan sa mga mitambong sa tigom.
Ang Barangay Assembly Day usa ka kalihokan pinasikad sa Seksyon 3978 sa Local Government Code of 1991 ug Presidential Proclamation No. 260 pinetsahan Septiembre 30,2011. (CIO/ebp).

Share on: