Isip pagpangandam sa umaabot nga 24th Mindanao Business Conference (MinBizCon) dinhi sa Dipolog karong bulan sa Setyembre , usa ka Mindanao Policy Consultation sa mga magpapatigayon ug ubang mga stakeholders sa Mindanao ang gipahigayon didto sa Dipolog Commercial Building sa miaging semana.
Tumong sa Minbizcon Roadshow nga magkatagbo ug magbinayluay ug mga huna-huna ang mga negosyante sa Mindanao nga sakop sa mga lokal nga Chamber of Commerce and Industry , mga opisyales sa Philippine Chamber of Commerce and Industry (PCCI), Department of Trade and Industry (DTI), ug ubang ahensya sa kagamhanan nga nalambigit sa kalihokan sama sa sektor sa pangisda, agrikultura, edukasyon, teknolohiya ug uban pa.
Si Dipolog City Mayor Evelyn Uy nga girepresentahan ni Ernie Rojo sa buhatan sa Local Economic Investment and Promotions Center ang mipadangat sa iyang maiinitong pagdawat sa mga bisita ug partisipantes sa roadshow. Si Uy, sumala pa sa iyang mensahe ang mipasalig nga ang dakbayan sa Dipolog andam na alang sa ika 24 ka tuig nga MinBizCon karong Setyembre 2-4, 2015.
Si Dipolog Chamber of Commerce and Industry President Atty. Paul Gudmalin nagkanayon nga ang tema sa umaabot nga MinBizCon mao ang “Winning the ASEAN, Gaining the Global Market”. Siya midugang nga karong tuiga magsugod na ang ASEAN economic integration. Ang Mindanao maoy usa ka maayong lugar alang sa negosyo tungod sa daghan ug abunda nga mga rekursos .
Dinapit nga mga mamumulong sa nasangpit nga okasyon mao sila si PCCI area vice-president for Mindanao Annie O. Ty, PCCI Regional Governor, Western Mindanao Pedro Rufo Soliven ug PCCI Executive Director Edwin Glindro. Mipa-ambit usab sa ilang kahibalo sa natad sa ekonomiya ug negosyo sila si DTI Zamboanga del Norte Provincial Director Engr. Noel Bazan, cocnut farmer Rey Quisumbing, Mindanao Development Authority (MinDA) area manager Jean Paul Tolentino ug Philippine Business for Social Progress (PBSP) Garibalde Alvin Enriquez.
Didto usab sila si Dipolog Medical Center Vice President for Academic Affairs Dr. Dino Cordova, Former Finance Secretary Dr. Juanita D. Amatong, ZN DepEd Chief Curriculum Instruction Division Dr. Lilia Abello, Milcah Capondag ug Anelyn Binancilan isip mga panelists atol sa open forum. (CIO/ebp).

Share on: