Nahidangat dinhi sa dakbayan sa Dipolog niadtong adlaw’ng Biernes, Abril 10, 2015 ang mga opisyales sa kagamhanang lokal sa Carcar, Cebu alang sa ilang Heritage and Tourism Sites Visitation.
Ang nahisgotang grupo ang gipangulohan ni Carcar Mayor Nicepuro L. Apura , Vice-Mayor Patrick Barcenas ug mga hepe sa lain-laing buhatan sa Carcar, kinsa nasayrang mipahigayon sa ilang courtesy call ngadto kang Dipolog City Mayor Evelyn Uy sa iyang buhatan sa City Hall.
Si Mayor Uy malipayong mipahibalo kanila nga aduna nay bag-ong biyahe sa barko direkta gikan Dipolog City ngadto sa Cebu City sa matag adlaw’ng Martes, Huwebes ug Domingo sa may alas 7 ang takna sa gabii. Ang pantalan ang nahimutang sa Barangay Galas ning dakbayan.
Ang mga bisita ang mituyo pag anhi sa dakbayan aron makita ang kahimtang sa siyudad ug masayran ang mga maayong hiyas kalabot sa pagdumala sa siyudad ug usab sa pagbinaylo-ay sa mga pamaagi sa pangagamhanan.
Sulod sa 2 ka adlaw ang mga bisita ang nasayrang milibot sa mga nagkalain-laing maanindot nga mga dapit dinhi sa dakbayan sa Dipolog ug Dapitan ug uban pang lugar sulod sa lalawigan sa Zamboanga del Norte. (CIO/ebp).

Share on: