Isaulog karong adlawa Biernes Hunyo 12, ang ika 117 ka tuig nga kasumaran sa Adlaw sa Kaugalingnan (Independence Day) dinhi sa tibuok nasud sa Pilipinas nga nagdala sa temang “Tagumpay sa Pagbabagong Nasimulan, Abot-Kamay na ng Bayan”.
Dinhi sa Dipolog, ang okasyon pagasugdan pinaagi sa usa ka programa sa may alas 7:30 ang takna sa buntag didto sa Plaza Magsaysay. Dinapit nga pinasidunggang mamumulong mao si Col Jesus A Mananquil Jr, Commanding Officer sa 101st Infantry Brigade, 1st Infantry Division sa Philippine Army.
Gitakda usab nga motambong sa programa sila si Dipolog City Mayor Evelyn T. Uy, Zamboanga del Norte Governor Roberto Y. Uy uban ang mga kawani sa lain-laing buhatan sa kagamhanang lokal , probinsyal ug nasyonal . Lakip nga moduyog sa nasangpit nga adlaw ang mga pribadong sektor ug organisasyon.
Human sa hamubong programa isunod dayon ang parada nga moagi sa Rizal Avenue, Quezon Avenue, General Luna ngadto sa boulevard.
Gidapit ang tanan sa pagduyog sa paghamdom sa bililhong adlaw sa kasaysayan sa nasud pinaagi sa pagbitay ug mga bandila dinha sa ilang mga balay, lugar patigayon o sakyanan.
Ang Adlaw sa Kaugalingnan ang gideklarar ni Heneral Emilio Aguinaldo, didto sa Kawit, Cavite kaniadtong Hunyo 12,1898. Sa susamang okasyon nasaksihan sa katawhan ang pagkayab sa bandila sa Pilipinas sa unang higayon didto sa balkonahe sa balay ni Heneral Aguinaldo sa Kawit, Cavite dungan sa pagtug-tog sa banda sa nasudnong awit o ( Philippine National Anthem). (CIO/ebp).

Share on: