Subli karong gipahibalo ang tanang mga nanag-iya ug mga bangkang panagatan ug ingon man usab sa atong kaigsoonang mga mananagat dinhi sa dakbayan sa Dipolog sa pagsanong ngadto sa nagapadayong “Mobile Fishing Boat Registration” pinaagi na sa fishery division sa buhatan sa agrikultura ning dakbayan.
Sigun sa talaan nga nadawat sa buhatan sa inpormasyon nga sa Pebrero 24 ngadto na sa 26, kining maong kalihokan ang ipahigayon dinha sa Barangay Minaog; dayon paga-sundan kini sa pagka Marso 3 ngadto sa 5 usab, dinha sa Barangay Barra.
Sa pagka Marso 10 ngadto na sa 12, – Barangay Miputak; Marso 17 ngadto sa 19 – Barangay Galas; ug pagka Marso 24 ngadto na sa 26, didto na usab sa Barangay Olingan.
Dugang pa sa tinubdang buhatan, nga ang mga buot mopahimulos ning maong mobile fishing boat registration ang gi-awhagang magdala sa mga nanag-unang dokyumento sama sa: 1) Barangay Clearance, 2) Cedula ug 3) Boat Measurement (sukod sa gitas-on ug gidak-on sa bangka).
Ang kapakyas sa pagsanong ning maong pagpa-renew sa ilang mga permit sa pagpanagat, kinsa masapnang nagapadayon gihapon sa pagpanagat, ang hayan mapahamtangan sa silot sigun sa gimando sa balaod, sama sa pagdili kanila sa pagpanagat o kaha sa pag-impound sa ilang mga bangkang panagatan.(CIO-alb)

Share on: