DSC_0124“Kaning Dipolog although duol ra sa Manila pero murag lisud adtuon. Wala kini sa listahan sa mga lugar nga sagad namo bisitahon uban ni Presidente sama sa dakbayan sa Davao, Cotabato ug Cagayan de Oro….. tungod kay ang Dipolog walay problema.”

            Tipik kini sa pamahayag ni Department of National Defense (DND)  Secretary Delfin N. Lorenzana nga nahimong Guest of Honor ug Keynote Speaker sa anniversary program alang sa 104th Adlaw sa Dipolog nga gipahigayon sa Zamboanga del Norte Convention and Sports Center, ning dakbayan kaniadtong Sabado sa hapon Hulyo 1 ning tuiga.

            Busa dako ang pasalamat ni Lorenzana ngadto kang Dipolog City Mayor Darel Dexter T. Uy sa pagdapit kaniya isip pinasidunggang bisita tungod kay nakabalik siya sa dakbayan uban ang iyang kapikas sa kinabuhi ug  ilang  anak nga babaye.

         Matud pa ni Lorenzana nga mao kini ang ikaduhang higayon nga nakabisita siya sa siyudad. Ang iyang unang pag-anhi sa Dipolog kaniadto pang 1997 sa dihang mibista siya sa 101st Infantry Brigade sa Lungsod sa Piñan.

            Diha sa iyang mensahe, gidayeg ni Lorenzana ang dakong pag-uswag ug paglambo sa Dipolog. Matud pa nga sigun sa kasaysayan sa nasud, usa lamang ka barangay ang Dipolog nga sakop sa Dapitan kaniadto. Apan sa makita karong panahona, mas milabaw pa ang Dipolog kon ikumparar sa Dapitan diha sa pagka-progresibo niini.

           Ang Dipolog nahimong lungsod sa tuig 1913 busa gisaulog karong tuiga ang ika 104 ka tuig nga kasumaran sa pagkahimugso niini.

            Iya usab nga gidayeg ang tibuok katawhan sa dakbayan nga naghiusa aron magpabiling hapsay ug malinawon ang Dipolog. Dugang pa niini nga dili kini mahimo sa mga lideres kung walay suporta sa katawhan.  

            Sa susamang kalamboan, si Lorenzana mipasalamat sa mga Dipolognon sa pagdawat sa mga kaigsoonang bakwit gikan sa Marawi City nga temporaryong nagpuyo karon sa Dipolog. Siya nanghinaut nga mobalik ra usab sila sa Marawi paghuman sa krisis nga giatubang karon sa nasangpit nga siyudad.  

            Mitambong sa 104th Adlaw sa Dipolog program sila si Dipolog City Mayor Darel Dexter T. Uy, Zamboanga del Norte Governor Roberto Y. Uy, Vice Governor Senen O. Angeles, 3rd District Representative Isagani S. Amataong,  kanhi Dipolog Mayor Evelyn T. Uy , uban pang mga opisyales sa siyudad ug lalawigan, barangay officials, mga hepe sa national ug local government offices, mga private sector representatives ug uban pa.

            Didto usab sa okasyon sila si DND Undersecretary Cesar Yano, kanhi AFP Chief of Staff Alexander Yano, kanhi 101st Infantry Brigade Commander Col Romero, Philippine Army 102nd Brigade Commander Col. Jacinto Bareng, 5IB Commanding Officer Lt. Col. Billy de la Rosa, PNP Police Director Orlando Ualat, ug ubang mga opisyales sa militar ug kapolisan.  (CIO/ebp).

             

 

Share on: