A photo of the late Michael Malaca- businessman and an active civic leader in Dipolog City (Photo source: Michael's FBaccount)

Photo of the late Michael Malacca (Photo source: Michael’s FBaccount)

 Atol sa regular nga sesyon sa konseho ning dakbayan sa Dipolog niadtong Hulyo 18, 2017, usa ka resolusyon ang gipasar pinaagi sa mosyon ni Konsehal Atty. Rubencio B. Legorio nga magpabati ug dakung pagpasalamat ngadto sa kapolisan sa dakbayan sa Cebu nga gipangulohan ni Police Senior Superintendent Joel B. Doria gumikan pagsulbad sa kaso sa pagpatay ni Michael Malacca.

      Si Michael Malacca usa ka Dipolognon nga magpapatigayon ug aktibo nga myembro sa mga non-government ug civic organizations sa komunidad ang gipusil-patay kaniadtong Mayo 4, 2017didto sa dakbayan sa Cebu.

     Tungod sa maong panghitabo, mipadangat ug sulat hangyo ang SP Dipolog ngadto sa Cebu City Police alang sa hinanaling kasulbaran sa maong kaso.

      Subay sa gipahigayong imbestigasyon sa kapolisan, nailhan ang suspetsado nga usa ka Nelson Rubio Ubas nga usa ka security guard sa tindahan nga 7/11-Colon Branch sa dakbayan sa Cebu. Lakip nga nasayran nga aduna’y duha ka John Does ang gikiha uban ni Ubas sa maong krimen.

     Apan sumala sa detalye nga gipadangat sa kapolisan, nasayran nga naka-ikyas ngadto sa laing dapit ang suspetsado pinaagi sa tabang sa inahan nga si Basilia Ubas ug igsuon nga si Brenda U. Icot.  Apan nasakpan ang maong suspetsado pinaagi sa usa ka follow-up operation sa kapolisan.  

     Nasayran nga mipasaka na karon ug kaso ang kapolisan sa dakbayan sa Cebu batok sa mga suspetsado ngadto sa Cebu City Prosecutor’s Office ubos sa IS number 17-E-01241. Lakip nga gipasakaan ug sumbong ang inahan ug igsuon ni Ubas gumikan sa paglapas nila sa Akta Republika 1829.  (CIO-MECC)

 

Share on: