LGU Dipolog officials and their families led by  Mayor Darel Dexter T. Uy had a great fun during the launching of Family  Day @ Dipolog Boulevard -June 24,2017.

LGU Dipolog officials and their families led by Mayor Darel Dexter T. Uy had a great fun during the launching of Family Day @ Dipolog Boulevard -June 24,2017.

          Puno sa kasadya ug kalipay ang unang pagpasi-ugda sa Family Fun Day niadtong Hunyo 24, 2017 didto sa Dipolog Boulevard nga gisugdan sa pagpahigayon sa Zumba ug gisundan sa usa ka hamobo nga programa.  

            Sa mensahe nga gipabati ni Mayor Darel Dexter T. Uy atol sa launching program, iyang gipasabot nga ang pagpahigayon sa Family Day usa ka kalihukan nga maghatag ug higayon sa mga pamilya sa tibook Dipolog nga magkahi-usa pinaagi sa mga kalihukan sama sa fun games, fun run, o simpleng picnic o bonding, tumong nga mapalig-on niini ang ilang relasyon isip pamilya nga mao usay makahatag ug kalig-on sa atong komunidad. Dugang ni Mayor Uy, laing tumong usab sa pagpahigayon sa Family Day mao ang paghatag ug pag-ila sa mga pamilya nga maoy sugkaran sa mga maayong hiyas sama sa gugma, unang edukasyon, respeto, panaghi-usa, maayong pamatasan, proteksiyon, ug uban pa.

            Human sa hamobo nga programa, gipahigayon gilayon ang 3 ka kilometro nga FAM FOAM RUN (Family Foam Run) nga gipangunahan sa pamilya ni Mayor Darel Uy. Mikabat sa 50 ka pamilya ang misalmot sa FAM Foam Run ug ang migulang manana-ug (unang mi-abot sa finish line) mao ang Reganion Family. Gisundan kini sa pamilyang Balansag isip 2nd placer ug Romano Family, isip 3rd placer. Ang Biggest Family (members) nakamit sa Calagui Family, ug ang Most Colorful Attire nakuha sa “Sutoy Dipolog” Group. Ang mga manana-ug ug special awardees nagpakadawat sa tropeo, grocery items, ug cash.

            Mibulok ang kalihukan sa buntag sa pagpahigayon sa Family Fun Games nga gisalmutan sa mga pamilya. Mipadayon ang Family Day sa pagpahigayon sa usa ka Art Exhibit, drawing ug coloring nga gisalmutan gihapon sa mga pamilya, ug napahimuslan nila ang ubang kalihukan sama sa photo booth, body massage, face paint, henna tattoo, bike rental, family picnic, ug uban pang kalihukan.

            Mibulok ang tibook adlaw nga kalihukan pinaagi sa pagpahigayon sa Family Night kauban sa mga miyembro sa Pag-asa Youth Association of the Philippines, nga mipasundayag ug variety show.

            Sumala pa ni Mayor Uy, ang kalihukan sa Family Day himoon matag Sabado sa semana ug sirado sa vehicular traffic ang boulevard gikan sa Amatong Road hangtud na sa Velasco St. aron sa paghatag ug higayon sa mga pamilya nga magsadya, motapuk, ug mag-relax pinaagi sa mga gihan-ay nga mga kalihukan. (CIO/prr/mecc)                 

 

 

Share on: