Dipolog City Mayor Darel Dexter T. Uy during the Tribute to Public Servants program

Dipolog City Mayor Darel Dexter T. Uy during the Tribute to Public Servants program

       Usa sa mga kalihokan sa 104th Adlaw sa Dipolog mao ang Tribute to Public Servants and Special Awardees o ang paghatag ug pahinungod sa mga kawani sa siyudad nga miretiro na sa serbisyo ug kadtong mga kawani nga  mitaliwan na karong tuiga.

     Ang okasyon gipangunahan ni Dipolog City Mayor Darel Dexter T. Uy ug  gipahigayon didto sa Function Hall , Dipolog Boulevard Commercial Complex Building, kaniadtong Hunyo 29 sa buntag ning tuiga.

      Nasayran nga 21 ka mga retiradong  kawani sa siyudad ug 29 ka mga magtutudlo sa pampublikong eskwekahan sa Dipolog ang  midawat sa mga pahinungod.

      Gidawat usab sa pamilya sa  5 ka  mga mitaliwan na nga mga empleyado ug mga magtutudlo ang posthumous awards alang kanila.

      Mihatag usab ug mga special awards ang kagamhanang lokal sa Dipolog sa pipila ka mga personalidad ug mga tulunghaan nga nakahatag ug dakong tampo ug garbo alang sa kalamboan sa dakbayan sa natad sa edukasyon, sports, patigayon, maayong pangagamhanan ug uban pa.

     Ang mga special awardees karong tuiga mao sila si Zamboanga del Norte Governor Roberto T. Uy, kanhi Mayora sa Dipolog Evelyn T. Uy, 2016 Bar Topnotchers

Atty. Alanna Gayle B. Khio, ug Atty Athalia B. Liong. Lain pa nga mga special awardees mao ang mga tinun-an nga sila si Albren Jan Dayapdapan, Joshua de la Flor, Tyrone Manuel Ong, Ainah Pango, Joey Dian Claret, Josephine Peralta, Briget Recososa, Symon Pableo, ug  Rey Anthony Villaverde.

     Pipila ka mga tulunghaan ang gipasidunggan usab sama sa Andres Bonifacio College, Cor Jesu Seminary, Dipolog City Institute of Technology, Jose Rizal Memorial State University, Saint Mary’s Academy ug Dipolog Medical Center “Green Viper”.

      Sa susamang kalamboan si  Philippine National Police (PNP) Police  Director Orlando D Ualat- dinapit nga  Guest Speaker sa okasyon mipabati sa iyang pagdayig ngadto sa mga retiradong mga kawani tungod sa dedikasyon ug serbisyo nga ilang gihatag ngadto sa dakbayan sa taas taas nga katuigan.

       Iyang giila ang mga sulundon nga mga buhat sa mga kawani diin nakatampo ug dako alang sa padayon nga kahapsay ug kalinaw sa lugar ug sa paglambo sa dakbayan sa pagligid sa panahon.

     Gidayig ni Ualat ang liderato   sa 2 ka mga  miaging mayor sa dakbayan nga sila si Gobernador Roberto Y. Uy ug Evelyn T. Uy sa ilang maayong pagdumala sa Dipolog.

     Lakip nga gipasalamatan ni Ualat ang 2 ka mga Dipolognon nga nagdala ug garbo isip 2016 Bar Topnotchers , mga estudyanteng mahimong champions sa natad sa sports, ang mga magtutudlo nga sa kanunay naghatag ug maayong sumbanan sa mga kabataan, ang mga stakeholders ug ang komunidad.

     Si Ualat nadestino karon sa Directorate for Integrated Police Operations Visayas sa Camp Crame. Usa siya sa mga awardees sa Pangadlaw Awards 2016 sa Dipolog isip usa ka Dipolognon. (CIO/ebp).

 

    

 

Share on: