Full-fledged na gayud ang pagka-Provincial Director ni PSSupt Edwin BC Wagan sa Zamboanga del Norte Police Provincial Office (ZNPPO) human niya madawat ang GO#2017-1274 nga gipetsahan ug Hulyo 12, 2017  nga nagtudlo kaniya isip Provincial Director karon sa ZNPPO nga mi-epektibo niadtong Hulyo10, 2017.

            Mao kini ang gitaho ni P/Supt Charisse Yabu sa buhatan sa ZNNPO pinaagi sa usa ka text message nga iyang gipadala ngadto sa mga miyembro sa ZNPPO Press Corps niadtong Hulyo 17, 2017.

            Dugang nasayran nga ang nasangpit nga orden mitapos usab sa pagkatudlo kang PSSupt Wagan isip Acting Provincial Director sa ZNPPO sa milabayng 2 ka tuig ug tulo ka bulan sa pagserbisyo niya sa probinsiya sa Zamboanga del Norte.

            Sa pakighinabi ni PSSupt Wagan sa sayung buntag niadtong Hulyo 14 sa iyang buhatan, iyang gipabati nga ipadayon sa publiko ang pagka-magmabinantayon kanunay ilabi na sa pagproteher sa ilang kaugalingon ug sa ilang mga kabtangan, paghatag ug impormasyon sa ilang buhatan ilabi na sa mga makadudahong panghitabo o sa mga makadudahong grupo o indibidual nga makita nila sa ilang komunidad, ug pagtabang sa kapolisan sa pagsugpo sa problema sa illegal nga droga pinaagi sa paghatag sa impormasyon ngadto sa ilang buhatan. Sumala pa ni Wagan nga ang pagmintinar sa kahapsay ug kalinaw, dili lang kaakuhan sa kapolisan apan kaakuhan usab sa tanan, ug ang kalampusan niini nagkinahanglan sa hugot nga suporta ug kooperasyon sa tanan”, panapos niya. (CIO-prr) 

             

Share on: