Nahimong malampuson ang pagpahigayon sa ‘kick-off ceremony” ‘sa kasaulogan sa Labor Day niadtong Mayo 1, 2015 ubos sa pagpangulo ni DOLE-ZNPO (Zamboanga del Norte Provincial Office) Chief LEO/FO (Labor Employment Office/Field Office) Head, Ms. Lourdes B. Amores.
Kahibalo-an nga gisugdan pinaagi sa usa ka motorkada libut sa syudad nga gisalmotan sa nagkalain-laing mamumuo gikan sa pipila ka pribadong establisemento ug mga patigayon sama sa pipila ka bangko, lending investors, fast-foods, tulunghaan ug uban pa.
Lakip nga misalmot usab mao ang buhatan sa TESDA, TIPC (Tripartite Industrial Peace Council)- Dipolog, lakip na ang mga miyembro sa Zumba.
Mihatag sa iyang Inspirational Message si TIPC- Chairperson, Mayor Evelyn T. Uy alang sa tanang misalmut, diin gisaysay niini ang kabahin sa daghanang sports events ang sunod-sunod nga ginapahigayon karon.
Sanglit nga duna’y dakung panglantaw ang kagamhanang lokal sa Dipolog nga mamahimong Center of Outdoor Sports by the Year 2020, kanunay na karong masaksihan ang mga paugnat sa kusog dinhi sa dakbayan. Busa alayon usab niini, gi-awhag sa Mayora ang tanan sa pagsuporta ug paglantaw ngadto sa mga nagkalain-laing dula.
Ang pipila ka paugnat sa kusog nga ipahigayon karong bulana mao ang ‘1st Dipolog Dragon Boat and Kayak Competition niadtong Mayo 2-3, 2015 didto sa Dipolog Boulevard. Karong umaabot Mayo 9-10, 2015, gikatakdang ipahigayon usab ang 3rd Triathlon Competition, ug karong umaabot Mayo 16, 2015 gikatakda nga ipahigayon usab ang PBA game sa Black Water Elite versus Barangay Ginebra San Miguel Kings.
Dugang pa ni Mayor Uy nga kini ug daghan pang mga paugnat sa kusog ang gikatakdang ipahigayon dinhi sa dakbayan alang sa katumanan sa Sporty Dipolog by 2020.
Usa ka GAD (Gender and Development) message ang gihatag ni Ms. Amores ngadto sa tanang nanambong, diin gipasabot niini ang kabahin sa tahas sa matag usa, sama pananglitan ang tahas sa usa ka asawa ug tahas usab sa usa ka bana.
Alayon sa Sporty Dipolog 2020 vision, human sa hamubong programa lakip nga gipahigayon ang zumba nga ehersisyo.

Share on: