Usa ka Halad Pasalamat ang malampuson gipahigayon alang sa pagtak-op sa kasaulogan sa ika-63 nga kasumaran ning lalawigan sa Zamboanga del Norte niadtong Hunyo 6, 2015, diin gisugdan kini pinaagi sa usa ka parada gikan sa Zambopanga del Norte Sports Complex padulong sa Dipolog Boulevard ning dakbayan.
Sa Opening Remarks ni Mayor Evelyn T. Uy atol sa maong programa, gipahinumduman niini ang tanang nanambong nga angayan lamang nga pasalamatan ang kahitas-an sanglit nga kanunay siyang nagahatag sa iyang proteksyon ilabi na batok sa mga katalagman dinhi sa lalawigan.
Lakip nga pasalamatan usab ang kahitas-an ilabi na sa paghatag niya ug mga gasa ilabi ngadto sa mga lideres nga duna’y mga kasing-kasing nga maantigo maghunahuna alang sa kalamboan sa ilang mga katawhan.
Ang labing gamhanan dinhi sa yuta mao lamang ang pag-ampo. Diha sa pag-ampo mao kini ang higayon nga ang mga tawo makakomunikar ngadto sa langitnong amahan. Busa ang tanan ang gi-awhag alang sa pagdangop sa Dios pinaagi sa pag-ampo.
Mihatag usab sa iyang pag-ampo si Governor Roberto Y. Uy diin nakadayeg ang mga manambongay sa maong kalihukan gumikan kay lunlon kini nga kinutlo gikan sa balaang kasulatan
Kahibaloan nga gikalipay ug daku sa mga katawhang nanambong lakip ang mga kawani sa kagamhanang lokal sa Dipolog, mga kawani sa lalawigan, ang mga opisyales ug pipila ka mga katawhan gikan sa 21 ka barangay ning dakbayan, ang nagkalain-laing National Offices sa kagamhanang nasyonal, mga kawani sa mga pribadong establisemento, Dipolog City Police Station, PNP Provincial Command, 101st Infantry Brigade Band, Dipolog City Jail and Penology, ug uban pa.
Usa ka pag-ampo ang gihalad alang sa nagkalain-laing sektor sa katilingban, sama sa, pag-ampo alang sa pamilya, sa ekonomiya, sa media, sa culture and the arts, ug uban pa.
Gisunod usab ang ‘Torch Lighting’ nga mao’ynagsimbolo sa kahayag nga isabuwag ngadto sa mga katawhan ilabi na dinhi sa lalawigan sa Zamboanga del Norte.
Human sa Torch Lighting gisunod usab ang ‘Fire Works Display’ nga gikalipay kini sa tanang nanambong. (CIO-MECC)

Share on: