Nahimong malamposon ang pagpahigayon sa Awarding Ceremony sa mga Vision Aligned Circles (VAC), human kini mipa-ilawom sa usa ka Revalida niadtong nakalabay nga Enero 12 ngadto sa 15, ning tuiga.
Ang nasangpit nga kalihokan ang didto gipahigayon sa Building B, nga nahimutang didto sa Dipolog Boulevard niadtong nakalabay nga Enero 23, ning tuiga, ilawom sa pagpanguna ni City Mayor Evelyn T. Uy.
Ilawom sa Performance Governance System (PGS), ang mga buhatan ang gibahin-bahin ngadto sa mga grupo nga gitawag ug mga “vision aligned circles o VAC” nga nagbaton ug tag napulo (10) ka mga miyembro, kinsa maoy motrabaho alang sa mga trabaho nga gilantaw sa matag buhatan diin adunay kalambigitan ngadto na sa tumong sa PGS, nga nagatutok sa maayo ug sihag nga pangagamhanan, ug uban pang kaayohan dinha sa pagpadagan sa pangagamhanan.
Ang kagamhanang lokal sa Dipolog ang malamposong nakamugna ug 117 ka mga VACS nga gilangkoban sa mga nagkalain-laing buhatan, diin kining maong kalihokan ang gidumala sa Office of Strategy Management (OSM).
Sa nahimong resulta sa gipahigayong revalida, sa kinatibuk-ang 117 ka mga VAC’s, 18 niini ang nakadawat alang sa “Superior Performance” (VAC), samtang 54 usab niini ang napasidunggan alang usab sa “Praise Worthy”, 18 usab ang napasidunggan alang sa “Compliant Performance” samtang ang nahibiling 21 ka mga VACs ang nahatagan sa “Needs Improvement” alang sa ilang nahimong performance result.
Kining maong resulta sa nahimong revalida ang naka-palipay ning Mayor Uy ug sa mga kawani gumikan kay mitumaw gikan sa nahimong resulta nga sobra sa katunga sa gidaghanon sa mga buhatan ang nakitang naka-angkon ug kalamboan nga nagtimaan nga adunay nakat-onan ang mga kawani kalabot na sa pagkab-ot sa hingpit nga tumong sa PGS.
Dugang gilaoman nga sa umaabot pang mga adlaw, ang tanang mga kawani ug buhatan ilawom sa kagamhanang lokal ning dakbayan ang siento por siento nang maka-kab-ot sa hingpit nga katuyu-an sa Performance Governance System (PGS).CIO-alb)

Share on: