‘Dili angayan nga kabalak-an dinhi sa dakbayan sa Dipolog kung modagsang ang mga ‘Black Bug’, gumikan kay duna na’y mga pamaagi ang buhatan sa agrikultura ning dakbayan nga gi-andam alang sa pagsumpo niini’, mao kini ang tipik sa pamahayag ni OIC-City Agriculturist, Engr. Jose kerr Porlas.
Matud pa niini nga aduna’y duha ka mga pama-agi ang angayang paga-buhaton alang sa pagsumpo niini pinaagi sa Cultural Management ug paggamit sa kemikal.
Ang cultural management mao ang pagmintinar sa paglimpyo sa palibot sa basakan pinaagi sa pagkuha sa mga sagbot. Darohon dayun ang basakan human sa pag-ani ug pabaha-an dayun kini sa tubig gikan sa irigasyon.
Mas epektibo usab ang paggamit sa Direct Foliar Spray ilabi na diha sa puno-an sa humay, gumikan kay magsugod ang pangatake niini sa mga insekto diha mismo sa puno-an.
Gigamit usab sa DA ang pamaagi nga ‘Light Trap’, sanglit nga mahiligon kining matang sa peste sa sugang dagitab, sama sa ubang lalawigan, gigamit kini aron matapok ang mga nahisgotang peste dinha sa kahayag nga midan-ag kanila.
Bantayanan usab kining blackbug gumikan kay makahilo o toxic ang laway niini nga mao’y gitawag nga ‘Hopper Burn’.
Apan kung duna’y mga predators o manunubad ang mga basakan sama sa, lampinig, pato, bibi o itik, baki, timos, sayon lamang ang pagsumpo gumikan kay kaonon man ang mga peste niini, lakip na kining blackbug.
Nasayran nga wala’y pako ang black bug, busa maoy pagtuo sa atong mga mag-uuma dinhi nga nakasakay kini sa mga sakyanan pinaagi sa suga, o kaha malagmit nga nadala usab kini sa gidalang mga ‘ornamental plants’ nga gidala dinhi sa atong dapit gikan sa laing nasud. (CIO-MECC)

Share on: