Gihatagan sa tukmang pagtagad sa konseho ning dakbayan sa Dipolog ang usa sa mga proyektong gihatagan karon sa prayoridad ning dakbayan pinaagi na ni Mayor Evelyn T. Uy, nga mao ang giproponer nga pagpakongkreto sa road networks diha sa Cogon Eco-Park nga mokostar ngadto sa P34 milyones ka pesos.
Kahibaloan nga aron ma-indorso ngadto sa buhatan sa Tourism Infrastructure and Economic Zone Authority alang sa maong pondo, usa ka resolusyon ang gikatakdang pangamahanan sa konseho aron mahatagan ug katumanan ang giproponer nga pondo.
Alayon kini sa panglantaw sa syudad nga mamahimong Center of Outdoor Sports dinhi sa habagatang bahin sa Mindanao sa tuig 2020. Sanglit nga takdo man sa gidak-on ang Cogon alang sa maong katuyoan, busa gikinahanglan ang road network niini.
Nasayran nga duna’y mikabat sa 344 ka ektarya sa lasang ang gigahin sa buhatan sa DENR diha sa barangay Cogon, diin gilangkuban kini sa ‘second growth trees, natural grown trees, dipterocarp species and commercial species’. Duna’y 50 ka ektarya ang gitamnan sa rattan. Datu kini sa ‘biodiversity’ ug mao na lamang kini ang nagapabiling lasang dinhi sa dakbayan, diin sikbit kini sa Mt. Bulao watershed latas ngadto sa lungsod sa Polanco ug lungsod sa Piñan.
Lakip nga makapadugang kini sa kanindot sa maong dapit, makapadugang sa mga turista nga mobisita, makadugang sa kahamugaway, ug uban pa.
Ang Cogon Eco-Park ma’oy usa ka ideyal nga dapit alang sa mga field trips sa mga magtutungha ug mga magtutudlo. Makatabang usab kini alang sa Socio-Economic and Environmental Impact, gumikan kay ang mga lumulopyo niini ug mga magpapatigayon ang makabenepisyo niini sa panahon nga ma-implementar na kini. (CIO-MECC)

Share on: