Ang Philippine Red Cross Zamboanga del Norte Chapter ang mitunol sa ilang kinasing-kasing nga pasalamat ngadto sa Kagamhanang lokal sa Dipolog gumikan sa suportang pinansiyal nga nagkantidad ug Ph200,000.00 nga gihatag sa siyudad ngadto kanila .
Sa sulat nga gipirmahan ni Red Cross Board of Directors Chairperson Atty. Chandler O. Ruiz ug Chapter Administrator Joshua Amado Bicoy ngadto kang Dipolog City Mayor Evelyn T. Uy pinetsahan Marso 27 ning tuiga, ang Chapter Board of Directors, staff ug mga volunteers nagpasalamat sa dakbayan sa padayon nga suporta ug hinabang ngadto sa local Red Cross aron makab-ot ang ilang misyon ug panglantaw sa pag-alagad sa komunidad pinaagi sa pagluwas ug daghang kinabuhi.
Ang Red Cross nanghinaut sa padayon nga lig-ong pakigtambayayong alang sa katawhan sa dakbayan ug sa tibuok lalawigan sa Zamboanga del Norte. (CIo/ebp).

Share on: